Monday, October 26, 2015

මාරුව...!


             සුබ සැන්දෑවක් මිස්ටර් බෝ, කොහොමද පයිනස් ... අප්පා මේ සුළඟ හරි සැරයි නෙ අද.. රෑ වෙනකොට කුණාටුවක් එයි ද මන් ද..  මේ කාලෙට කොහොමත් හුලං ටිකක් සැරයි මිස්ටර් බෝ.. සමහරවිට රෑ වෙද්දී වහියි.. අන්න මිස්ටර් ජැක් දැනටමත් ඇවිල්ල ඉන්නේ.. මිස්ටර් බෝ ගිහින් වාඩි වෙන්න මම කෝපි අරගෙන එන්නම්.. ආ පයිනස් මට ටිකක් සැර කෝපි එකක් ගේන්න... සීනි චුට්ටක් වැඩියෙන් දාලා.. හොඳයි මිස්ටර් බෝ..

තානායමේ කෙළවර පිහිටි මේසය කොනේ සුරුට්ටුවක් උරමින් හවස පත්තරය බලමින් සිටි ජැක් සිය මිතුරා දෙස ඇස් කොනින් බලා නැවත කියවමින් සිටි ලිපිය දෙස අවදානය යෙදෙව්වේ එහි ඇති රසවත් බව නිසාමය.. 

සිය උඩු කබාය කබා රාක්කයේ එල්ලූ බෝ අවට සිටි සුපුරුදු මුහුණු දෙස අලස බැල්මක් හෙලුවේය. කඳුකර කුඩා නගරයේ මේ තානායමට අමුත්තන් පැමිණියේ නම් ඒ කලාතුරකිනි. හැමදාම හමුවන සුපුරුදු කිහිප දෙනා හැර වෙන කිසිවෙක් නොවුයෙන්  ජැක් උවමනාවෙන් බලමින් සිටි ලිපිය දෙස එබී බලමින් ගොස් සිය සුපුරුදු අසුනට බර දුන්නේය. තානායමේ කෙළවර මේසයේ වාඩිවී සිටි අඳුරු පැහැති රුව දෙස බෝ ගේ නෙත යොමු වුයේ පුරුද්දට මෙනි.. ගලා හැලෙන සැන්දෑ අඳුර නිසා හරියටම හඳුනා ගත නොහැකි වුවද මිට පෙර දැක නොමැති නුපුරුදු බවක් ඒ කෙරෙන් දිස් විය...


කෝ තාම නා ආවේ නැද්ද? පුවත්පත දෙස බලමින් සිටි මිතුරාගේ අවදානය ගැනීම පිණිස ඔහු හඬ අවදි කළේය...නෑ තාම නෑ..... බැම්බු එක්කම එනවා කිව්වා.. මම හිතන්නේ දැන් මග එනවා ඇති.. පත්තරයෙන් අවදානය නොබිඳ ගත් ජැක් හඬ අවදි කළේය. කෝ මටත් දෙනවකො ඔය සුරුට්ටුවක්..  මම තමුසෙගෙන් මේ සුරුට්ටු පෙට්ටියක් ගෙන්න ගන්න කී දවසක් කිව්වද...අදත් ගෙනාවේ නෑ නේද? ඕවා කාටද අයිසේ මතක් වෙන්නේ මේ රටේ ලෝකේ සිද්ද වෙන දේවල් දැක්කම .. ඇයි දැන් මොකක් ද වෙලා තියෙන්නේ.. මොකක් ද ඔය උනන්දුවෙන් කියවන ආටිකල් එක. .. පොඩ්ඩක් ඉන්නවා මේ අන්තිම ටික... ඒ ටික ඉවර වෙලාම මම සිද්දිය කියන්නම්.. ඔහු අනිත් අතින් සිය කබායේ තිබුණු සුරුට්ටුවක් ගෙන සිය මිතුරා දෙසට තල්ලු කළේය.

ඕ..පයිනස්... අනේ මට ගින්දර ටිකක් දෙන්න... අද මගේ ලයිටරේ අමතක වෙලා ද කොහෙද.. හරි පොඩ්ඩක් ඉන්න මිස්ටර් බෝ.. අසල මේසයට රැගෙන ආ බීර බෝතල් කීපය මේසය මතින් තැබූ පයිනස් ආචාරශීලි ලෙස පවසා කවුන්ටරය වෙත ගියේය.

හාත්පස ගලා එන සැන්දෑ අඳුර දෙස බලා සිටි බෝ සුරුට්ටුව මේසයට තට්ටු කරමින් දොර දෙස බැලුවේ නා සහ බැම්බු ගේ පැමිණීම බලාපොරොත්තුවෙනි.. 

අයිසේ බෝ ... තමුසේ හිතන්නේ මේ යක්කු මේ කරන්න හදන වැඩේ හරි කියල ද.. මම කිව්වේ මේ න්‍යෂ්ටික ආයුද සෙල්ලම.. දැන් බලනවා දෙගොල්ලෝ ගාවම ආයුද තියෙනවා. දෙගොල්ලොම කාටවත් පරදින්න කැමතිත් නෑ.. අන්තිමට මොකක් ද වෙන්නේ...?  කව්රු හරි ගැහුවොත් දෙගොල්ලොම ඉවරයි.. ඇයි දැන් කවුරු හරි ගහනවා කියල ද? බෝ ඇසුවේය.. නෑ නෑ එහෙම එකක් කියල නෑ.. හැබැයි වමේ ලොක්කා පොඩි සද්දයක් දාල තියෙනවා..  මේ බලනවා මේ කතාව... මම නම් හිතන්නේ නෑ තව වැඩි කාලයක් මේක බැලන්ස් වෙලා තියෙයි කියල.. කෝ දෙනවා බලන්න පත්තරේ.. ජැක් පත්තරය බෝ දෙසට තල්ලු කළේය.

ඒ පයිනස් කන්න මොකුත් නැද්ද... ඔය තියෙන දෙයක් අරන් එනවකෝ... කෝ මේ නා  තාම නෑ නේ.. 

හරි මිස්ටර් ජැක්  මස් ස්ටු එකක් ගේන්න ද? නැත්නම් ෆ්‍රයිස් මොනවා හරි ගේන්න ද?
ඒයි බෝ තමුසේ මොනවට ද කැමති..  ?

අනේ මට ඕවා කන්න බෑ ජැක්.... මම ඔය මොනවා හරි පැණි රහක් කාලා කෝපි බොනවා.. තමුසේ කැමති එකක් ගන්නවා.. 

හරි පයිනස් එහෙනම්  ස්ටු එක ගේනවා තව බිර එකකුත් එක්කම.

හලෝ බිරියෝසා .. කොහොමද ඉතින් ..තමුසේ මහත් වෙලා නේ.. අපරාදේ කියන්න බෑ තමුසෙලා නම් හරහට උස යනවා හිටු කියල.. එකට අපි...  හෙහ් හෙහ්.. මම දැක්ක ඊයේ හවස පාර දිගේ නොන්ඩි ගගහ යනවා.  මොකෝ වුනේ.. ? අල්ලපු මේසය දෙස හැරුණු ජැක් බිරියෝසා ට තට්ටුවක් දමමින් ඇසුවේය..

අනේ මන්ද ජැක් මේ මුලක් පොඩ්ඩක් අවුල් ගිහින් .. හරියට ඇවිදින්න අමාරුයි...  එකක් අනිකේ පැටලෙනවා...

ආ ඕක ද .. ඕක මහ දෙයක් ද... මම හිතුවා බරපතල කේස් එකක් කියල... හෙහ් හෙහ්.. ඒ එක නෙවෙයි... මම මේ අහන්නමයි හිටියේ අර අල්ලපු ඉඩමේ ඉන්න රෝස මෙනවිය තමුසේ හොඳට දන්නවා නේද... හෙහ් හෙහ් ජැක් ඇස් පුංචි කරමින් ඇසුවේය...  ඔව් ඔව් පොඩි කාලේ ඉඳන් අපිත් එක්ක හැදිච්ච රෝසව මම නොදනන්නවයි...  ඇයි තමුසෙට හදිස්සියේම රෝසව මතක් වුනේ.. ජැක් ගේ අවඥා සහගත කතා විලාසයට නොරිස්සුමෙන් බිරියෝසා ඇසුවේය...

ආ බැම්බු... දැන්ද එන්නේ...කෝ... නා.. අනේ මන්ද වෙලාවක් කිව්වා නම් වෙලාවට එනවා අයියේ... තමුසෙලා හැමදාම ඔහොම නේ..ඒ වෙලෙහිම තානායම ට ඇතුළු වුනු මිතුරන් දෙදෙනා ජැක් පිළිගත්තේය..

අනේ ජැක් මේ නා ගේ පොඩි වැඩක් තිබ්බා.. එකයි පොඩ්ඩක් පරක්කු වුනේ..

හලෝ පයිනස්.. හලෝ ටර්ප්.. සුබ සැන්දෑවක් මිස්ටර් ටූනා.... හප්පා මේ හුළඟ .... තද සුළඟින් ගැලවීමට පොරවා ගත් කබාය ගලවමින් ඇතුලට පැමිණි නා සිනා මුසු මුහුණින් තානායමේ රැඳී සිටියවුන් ට ආචාරශීලි වෙමින් ඇතුලට ආවේය..

නෑ නෑ අයිසේ මම රෝස ගැන හොයල බැලුවේ ඉතින් යුතු කමට... මම දන්නවා රෝස ගැන. අනිත් එක රෝසල අපේ පවුල් වල දුර නෑයොත් වෙනවා...  අනේ බොරු නොකියා යනවා ජැක්...තමුසෙලා කොහොමද රෝසලගේ නෑයෝ වෙන්නේ.. රෝස ල අයිති වෙන්නේ Rosaceae ලට නේ තමුසෙලා
Artocarpus පවුලේ නේද... .  නිකන් අහසයි පොළොවයි වගේ.. හැබැයි නෑයෝ ලු.. මන් නොදන්නවයි තමුසේ ගැන...නිකන් වැඩක් බලාගෙන ඉන්නවා ජැක්..

ඔව් ඔව් අපි  Artocarpus Heterophyllus තමයි ඉතින් ... Artocarpus මොකද Rosaceae මොකද... 

ඕ  ජැක් ඔය බිරියෝසට පාඩුවේ ඉන්න ඇරලා මට ඔය ටිෂු එකක් අරන් දෙනවා.. මේ හුළඟ හින්ද හරි අමාරුයි.. සිය අතුපතර සෙමින් ගසා දැමු නා පැවසීය...

බැම්බු සිය උස්වූ සිරුර හරි බරි ගස්සමින් පයිනස් විසින් රැගෙන එන ලද කෝපි කෝප්පය තොල ගාන්නට ගත්තේය..

මුන්ට පිස්සු මේ ලෝකේ මෙච්චර විසදන්න ප්‍රශ්න තියෙද්දී නිකන් බොරුවට කා කොටා ගන්නවා.. දැන් බලන්න මේ සත්තු, පරිසරය, වතුර දිහා කාටවත් කරදරයක් නෑ නේ.. ගල් කාරයෝ එහෙන් මෙහන් ටිකක් කචල් දැම්මත් පාඩුවේ ඉන්නවනේ... අනිත් ඒක මේ ශිෂ්ටාචාරය දියුණු වෙන්න පටන් අරන් ගෙවුණු පරිබ්‍රමණ 20000-30000ක කාලේ ඇතුලත අපි කොච්චර ආත්මාර්ථකාමී වෙලා ද කියල... දැන් මේ එකේ හිනි පෙත්තටම ඇවිල්ල තියෙන්නේ... බැරිවෙලා හරි න්‍යෂ්ටික යුද්ධයක් ආවොත් ආයේ මේක සුන්නද්දුලි වෙලා යනවා .. දෙකක් නෑ.. කියවමින් සිටි පුවත් පත ඉවත දමමින් බෝ පැවසුවේය... 

අයිසේ බෝ... තමුසේ හිතන විදියට මේ ලෝකේ වැඩ වෙන්නේ නෑ...ඒවා සිද්ද වෙන්නේ ඒවාට ඕනේ විදියට. නිකන් කෑ නොගහ මේ මස් කෑල්ලක් කාල බීර ටිකක් බොනවා.

සිය දෛනික කටයුතු වලින් අනතුරුව සවස් කාලය තානායමේ ගෙවා දැමීම ටවුමේ බොහෝ දෙනාගේ සිරිත විය. සති අන්තයේ ආරම්භයත් සමග ඔවුන් එහි ගෙවන කාලය වැඩි වීම සාමාන්‍ය දසුනක් විය.

බෝ, නා, බැම්බු සහ ජැක් එකම විශ්වවිද්‍යාලයේ සේවය කල පර්යේෂකයින් වූ අතර ඔවුන් ගේ විශ්ව විද්‍යාලය පිහිටියේ කඳුකර ටවුමට පහලින් වූ නිම්න නගරයේය. කුඩා කල පටන් එකට හැදුනු වැඩුණු නා සහ බෝ,  ජැක්  සහ බැම්බු සමග මිතුරු වුයේ සිය පර්යේෂණ කටයුතු වලදිය. එකිනෙකට වෙනස් ගති පැවතුම් ඇතත් ඔවුන් සිවු දෙනා තමන්ට පොදු වූ සමහර කරුණු හේතුවෙන් මිතුරන් බවට පත්විය. 

එක නෙවෙයි බෝ ඊයේ කතාවේ ඉතිරි ටික කියන්න මේක හොඳ වෙලාව නේද..? උණුසුම් කෝපි කෝප්පයෙන් මදක් තොල ගාමින් නා ඇසුවේය..

මොකක් ද ඊයේ කතාව ..මස් කෑල්ලක් සමග ඔට්ටු වෙමින් සිටි ජැක් වෙර දරමින් මස් කටුව වෙන් කරන අතරතුර ඇසීය...

මම දන්නෙත් නෑ මොකක් ද ඒ... සාමාන්යෙන් කතා අඩු බැම්බු ද හවුල් විය..

හ්ම්... සුරුට්ටුවෙන් උගුරක් ඇද දුම් වළල්ලක් පිට කල බෝ මදක් වට පිට බැලුවේ පුරුද්දට මෙනි... එහි කිසිම රහසක් නොවුවද ඔහුට යම් සැකයක් අවට පරිසරය පිළිබඳව ඇතිවී තිබිණි...

ඒක එච්චර දෙයක් නෙවෙයි මම පොඩි ටෙස්ට් වගයක් කරනවා. මේ සත්තු එක්ක. 

මිස්ට බෝ කොහොමත් සත්තු එක්ක නේ වැඩ කරන්නේ .. 

ඔව් බැම්බු... හැබැයි මේ සැරේ මේ වැඩේ මම කරන්නේ පොඩ්ඩක් යටින්.. ඒ කිව්වේ මගේ නෝමල් වැඩ වලට අමතරව.. මොකද මේක කෙලින් ම මිනිස්සුන්ට සම්බන්ධ දෙයක්...

මම ඊයේ නා හම්බ වෙච්ච වෙලාවේ පොඩ්ඩක් කතාව කිව්වා හැබැයි හදිසියේම ප්‍රොෆෙසර් බැන්යන් ආපු නිසා අපේ කතාව නතර වුණා. 

කියන දෙයක් දැන් මුල ඉඳන්  ම කිව්වොත් හොඳයි බෝ මහත්මයා... කටකාර ජැක් මස් කැබැල්ල ලිස්සා යාමට පහසු වෙන පරිදි බීර උගුරක් බී කට පිසදා ගත්තේය... ඔහුගේ අත්තක් අසල සිටි බිරියෝසා ගේ කඳේ වැදී ගිය ද ඔහු ඒ ගැන මායිම් නොකළේය... නොරිස්සුමෙන් හැරුණු බිරියෝසා වෙත සමාව ඉල්ලන බැල්ම ක්  හෙළුවේ අනෙක් පස සිටි නා විසිනි.

වැඩි දෙයක් නෙමේ ජැක් මේකයි... මතකද අපි දවසක් කතා වුණා මේ 3න් වෙනි ග්‍රහයා විතරක් මේ විදියට ජිවය සහිත වෙන්න පුළුවන් හේතු ගැන..

ඔව් ඉතින් පිහිටීම නිසා ඇති වෙච්ච දේශගුණික වාසි නිසා තමයි ඕක වෙන්න පුළුවන්..මම එදත් කිව්වේ .. ජැක් පැවසුවේය...අනිත් එක වායු ගෝලයේ සංයුතිය.. අපි වගේ කාබනික ජිවය පවතින්න අයිඩියල් ම විදියට ඒක හැදිලා තියෙනවා. පරිසරය සහ දේශගුණය පිළිබඳව ප්‍රධාන වශයෙන් සිය පර්යේෂණ මෙහෙය වූ ජැක්  සිය ජීවිතය සැහැල්ලුවෙන් ගෙවු විනොදබර චරිතයකි.

ජීවයේ උපත ගැන ඔය එක එක මත තියෙනවනේ. ඕවා ගැන කතා කරලා වැඩක් නෑ... හැමදාම තර්ක විතරයි..

මම කියන්නේ ඒ තර්ක ගැන නෙවෙයි.. දැන් මේ ලෝකේ ප්‍රධාන වශයෙන් තියෙන්නේ වර්ග 3යි. අපි වතුර අතාරිමුකෝ.. එක ශාඛ, දෙක සතුන්, තුන පාෂාණ.

හෙහ් හෙහ් ගල් ද? ගල් කාරයෝ ගැන මතක් කරන්න එපා.. අන්න ඊයෙත් පල්ලෙහා වලියක් දාගෙන තිබුනා..

දැන් බලන්න මේ ලෝකේ තියෙන සම්පත් නාස්ති වෙලා තියෙන තරම..  අපේ බෝවීම පාලනය කරන්න අපිට හැකියාවක් නෑනේ.. අනිත් එක මම හිතන්නේ නෑ පොලවේ තියෙන සාරය තව වැඩි කාලයක් මේ විදියට තියෙයි කියල...

නමුත් බෝ පොලවේ සාරය කියන එක චක්‍රීය ක්‍රියාවලියක ප්‍රතිඵලයක් නේ.. ඒක නැති වෙන්න විදියක් නෑ නේද.. කවදත් සාවධානව අසා සිටින නා ඇසුවේය...

ඒක හරි නමුත් දැන් දැන් ඒ චක්‍රය බිඳවැටෙමින් නේ යන්නේ... අපේම වැඩ වලින්..

හරි බෝ ... දැන් තමුසෙගෙ කතාව කියනවකො.. මේ සිස්ටම් එකේ අවුල් විසදන්න පුළුවන් විදියක් තමුසේ හොයා ගත්තද..

පොඩ්ඩක් ඉන්න ජැක් මම මේ ඒක තමයි පැහැදිලි කරගෙන එන්නේ... මම කියන්නේ මේ ග්‍රහයා තුල ජිවය පරිනාමය වීම සිද්ද වෙලා තියෙන්නේ වැරදි විදියට කියල .හේතුව මේකයි අපි මුළු ලෝකය පුරාම වසංගතයක් වගේ පැතිරිලා ගිය ජිව කොට්ටාශයක්.. කිසිම පාලනයක් නැතුව ඔහේ ව්‍යාප්ත වෙනවා.. ගණන් කරන්න බැරි තරමක් විවිධ ප්‍රබේධ ... අනිත් එක බහුතරයක් කිසිම ඵල දායි දෙයක් කරන්නේ නෑ.. කිසිම නිෂ්පාදනයක් නෑ.. ඔහේ පොලවේ සාරය උරාගෙන ජිවත් වෙලා මැරිලා යනවා..දැන් ඔය ජැක් කියපු ගල් කාරයෝ.. මෙලෝ වැඩක් තියෙන ජාතියක් ද... ඔහේ එහාට මෙහාට කැරකි කැරකි දකින දකින දේ විනාශ කරලා දාන එක නේ කරන්නේ.. බුද්ධියක් කියල කිසිම දෙයක් උපතින්ම නෑනේ.. ඉතින් මොකක් ද ප්‍රයෝජනේ .. මගේ තර්කය මේකයි අපි වෙනුවට සත්තු පරිණාමය වුණා නම් මේ ලෝකේ මීට වැඩිය සාර්ථක වෙන්න තිබුනා...

ඒකට මට එකඟ වෙන්න බෑ මිස්ටර් බෝ...

මමත් බැම්බුගේ පැත්තේ.. මොකක් ද ඔහේ ගේ පදනම...

මගේ පදනම කියන්න කලින් අපි සාර්ථකයි, අපි යන්නේ විනාශය දෙසට නෙවෙයි කියන්න ඔයාලට තියෙන විශ්වාසය මොකක් ද?

ඒයි පයිනස් තව මොනවා හරි ගේනවා.. අද නම් සෑහෙන්න බොන්න ඕනේ දවසක් වගේ... ජැක් වේටර් වරයාට කෑගැසුවේය....

අපේ පදනම අපි පොළෙවෙන් ම හට ගෙන පොළොවටම පස් වෙලා යන ජීවයක් වීම...ඒ කියන්නේ අපි මේ විශ්වයේ නීතියට අනුව ඉන්න ජාතියක් වීම...  නා කල්පනා කාරී ලෙස පැවසුවේය.. ආ අන්න ඔන්න ඕකයි මමත් කියන්න ගියේ... මේ ටික බීලා ඉවර වෙලා ඕකමයි මමත් කියන්න හැදුවේ...ජැක් සිය අවසන් බීර උගුර හලා ගනිමින් පැවසුවේය...

අනිත් එක බෝ සත්තු කියන්නේ නිෂ්ක්‍රිය ජාතියක් නේ... සත්තු ඔහේ තියෙන ඔක්සිජන් ටික උරාගෙන කාබන් ඩයොක්සයිඩ් පිට කර කර ඉන්නවා... අනිත් එක සත්තුන්ගේ බුද්ධිය අපිට වඩා උසස් කියල කියන්නේ කොහොමද.. ? ආ ආ ඒකනේ...ඔය තියෙන්නේ තර්ක.. ජැක් ඔහු අසල සිටි බැම්බු ට තට්ටුවක් දමමින් පැවසිය..

සත්තු ගැන මම දැන් කාලයක් තිස්සේ පර්යේෂණ කරනවා. සමහර සතුන් ගැන ඔය කියන තර්ක හරි... හැබැයි එකෙන් කියන්නේ නෑ අපි ඒ සත්තුන්ට වඩා දියුණුයි කියන එක.. මම සරල උදාහරණයක් ගන්නම් දැන් බලන්න මේ තානායම කොච්චර ලොකු ද කියන එක.. මේකේ වහලේ අපිට වඩා කොච්චර උසද? අපේ ශරීර ප්‍රමාණ හැටියට අපිට ඕනේ කරන සම්පත් ප්‍රමාණය හරි වැඩියි.. අපි වගේ 10 ගුණයක් නැත්නම් 20 ගුණයක් කුඩා ප්‍රමානෙට හැදිච්ච සතුන්ට අවශ්‍ය වන සම්පත් ප්‍රමාණය මිට වැඩිය කොච්චර අඩු වෙන්න ඕනේ ද? මම හිතන්නේ සත්තුන්ගේ මුලික අවශ්‍යතා ටික ඉෂ්ට කරගන්න ඕනේ වෙන්නේ සොබා දහමෙන් ඉතාමත් කුඩා සම්පත් ප්‍රමාණයක් විතරයි..

අනිත් කාරණේ අපි මේ පහුගිය පරිභ්‍රමණ 20000-30000 ඇතුලත ලබාගෙන තියෙන දියුණුව මහ ලොකු එකක් නෙවෙයි.. අපි ප්‍රවාහනයට යොදා ගන්න යන්ත්‍ර කොතරම් විශාල ද? ඒ වෙනුවෙන් වැය වෙන ශක්තිය කොතරම් ද..? හරි විද්‍යාත්මක පැත්තෙන් අපි දියුණුයි.. නමුත් ඒක අපි මේ ලෝකයේ ජිවත් වෙච්ච කාලයට සාපේක්ෂව හරිම අඩු දියුණුවක්.. අපි හරිම ඒකාකාරී රාමුවක් ඇතුලේ ජිවත් වෙන ජිව කොට්ටාශයක් කියල හිතෙන්නේ නැද්ද.. ? එහෙම වෙන්න හේතුව අපේ පද්ධතිය හැදිලා තියෙන්නේ සරල සිද්ධාන්ත වලින් වීම නිසා... නමුත් සත්තුන්ගේ ශරීරය ඊට වඩා සෑහෙන්න සංකීර්ණයි.. විශේෂයෙන් ම මිනිස්සුන් ගේ ශරීරයේ ඉහලින් ම පිහිටලා තියෙන කොටස... මම ඒ ගැන තමයි පරීක්ෂණ කරන්නේ මේ දවස් වල...

මේ වන විට වැස්සක් සහිත තද සුළං හමමින් මද කුනාටු තත්වයක් ඇති වෙමින් තිබිණි. ගෙරවිලි සහිත අකුණු ගැසීම් බොහෝ වුවත් තානායමේ රැඳී සිටියවුන් අතර අවට පරිසරය පිළිබඳව එතරම් අවධානයක් දැක්වූ කිසිවෙක් නොවිය... එබැවින් තානායම ඉහල අහසේ පාවී ගිය ඩ්රෝන යානය ගැන කිසිවෙකුගේ අවධානය යොමු නොවිය..

පයිනස් විසින් මිතුරන් සිව් දෙනාට අවශ්‍ය කෑම බිම ආදිය මේසය මතින් තබා පිටව ගියේය..

ඔහේලා දන්නවනේ අපිට සත්තු ගැන පරීක්ෂණ කරන්න දාල තියෙන බාධක ගැන...  ඇයි අපිට මිනිස්සු ගැන පරීක්ෂණ කරන්න එපා කියල තියෙන්නේ... ? දුම් දමමින් තිබුණු කෝපි උගුරක් බිව් බෝ ඇසුවේය...

වෙන මොකක් ද ඉතින් සතුන් සුරැකීම ට නේ... මොකද සතුන් කියන්නේ මේ පරිසරය අලංකාර කරන සීමිත ජීවී විශේෂයක් නිසා ආරක්ශාවටනේ ඔය එපා කියන්නේ.. එසේ පැවසුවේ බැම්බු ය..

හෙහ් හෙහ් අනේ බැම්බු තමුසේ දන්නේ පොතේ තියෙන දේ විතරනේ... අයිසේ ඕකට කියන්නේ ගස් පාලනේ.. ගස් පාලනේ.. පේනවනේ ඉතින් අර වමෙයි දකුනෙයි දෙන්න න්‍යෂ්ටික යුද්ධයක් ඇදගෙන අපිට තියෙන සැබෑ ප්‍රශ්න අමතක කරවන්න හදන අපූරුව... හෙහ් හෙහ් ජැක් පැවසුවේය..

විශේෂයෙන් මිනිසුන් ව පරික්ෂා කිරීම තහනම් කරලා තියෙන්නේ නම් බෝ ඔය කියපු සංකීර්ණ පද්ධතිය නිසා.. මොකද ඒක තේරුම් ගන්න මිනිසුන් විනාශ කරන එක අපරාදයක් විදියට නේ සලකන්නේ.. නා පැහැදිලි කළේය..

හ්ම්.. ඔය සංකීර්ණ පද්ධතිය ඇතුලේ හරිම පුදුමාකාර දේවල් තියෙනවා ..

මම මේ නිකමට අහන්නේ බෝ, දැන් ඔය පරිණාමය මාරු වුණා කියමුකෝ ඒ කියන්නේ අපි වෙනුවට සත්තු පරිණාමය වුණා කියල.. එහෙම උනා නම් අපි කොහොම හිටියි ද? ජැක් උනන්දුවෙන් ඇසුවේය..

මට ඒක හරියටම කියන්න බෑ.. සමහර විට අපි එක තැනක ඉඳන් උසට උසේ හැදිලා.. ඔහේ මැරිලා යයි.. සත්තු සමහර විට අපේ ශරීර වලින් ප්‍රයෝජන ගනියි.. සමහරවිට ඔය තමුසෙගෙ ඇඟ පුරා හැදෙන ගෙඩි එහෙම කයි ද දන්නෙත් නෑ.. හෙහ් හෙහ්...

හ්ම්... ඔව් ඉතින් අපි මේ ඔය ඔහේ හැදෙන සත්තුන් ව කන්නේ.. මස් විදියට... සමහරවිට ඒක අනිත් පැත්තටත් වෙන්න තිබ්බා තමයි..  ජැක් කල්පනාකාරී ලෙස පැවසුවේය..

මිස්ට බෝ , අපිට වැඩිය සත්තුන්ගේ බුද්ධිය වැඩි වුණා නම් මොන මොන පැති වලින් කියල ද හිතන්නේ..  නා ඇසුවේය..

මම දැනට තේරුම් අරන් තියෙන විදියට සතුන් අතරින් මිනිසා තමයි පරිනාමයේ ඉහලටම එන්න ඉඩ තියෙන්නේ.. අනිත් සතුන් සමහරවිට විවිධ පැති වලින් දක්ෂ වෙන්න ඉඩ තියෙනවා.. සමහර විට දිවීම, පැනීම වගේ දේවල් වලින් නමුත් මිනිස්සු සමස්තයක් විදියට හැම පැත්තෙන් ම දියුණු වෙන්න ඉඩ තියෙනවා..

අනිත් එක ආදරය, සෙනෙහස, කරුණාව වගේ දේවල් මිනිස්සු තුල ඉතාමත් ගැඹුරු විදියට පිහිටන්න ඉඩ තියෙනවා... ඒවගේම තරහව වෛරය වගේ දේවලුත් ඒවගේම ගැඹුරු විදියටම තියෙන්න ඉඩ තියෙනවා.. අනිත් එක ඔය උඩින් ම තියෙන කොටසේ සංකීර්ණත්වය නිසා මම හිතන්නේ අපිට වැඩිය බොහොම කලින් ඒ කියන්නේ සත්ව ශිෂ්ටාචාරය දියුණු වෙන්න පටන් අරන් පරිබ්‍රමණ 2000-3000ක් වගේ කාලයකදී අපි දැන් මේ ඉන්න මට්ටමේ ඉඳියි.. මොකද මම දැනට හොයා ගත්ත විදියට ඒකට බොහොම අපුරු විදියට යමක් මතක තියා ගැනීම සහ නැවත ඒ මතකය ලබා ගැනීමේ හැකියාව පිහිටලා තියෙනවා. සමහරවිට නිර්මාණශීලි විදියට හිතන්න පුළුවන් හැකියාව අපිට හිතා ගන්නත් බැරි තරම් වෙන්න පුළුවන්...අනිත් එක මට තාම නොතේරෙන විදියේ පිරිසිදු සිහියක් පවත්වා ගන්න මිනිසුන්ට පුළුවන්.. හැබැයි මම දන්නේ නෑ ඒක කොහොම ද සිද්ද වෙන්නේ කියල..

දැන් බෝ හිතන්නේ මේක මේ විදියට වෙන්න ඇත්තේ මොකක් නිසා කියල ද? බැම්බු ඇසුවේය..

මොකක් මොන විදියට ද? ජැක් මැද්දට පැන්නේය..


ඇයි මේ ලෝකේ පරිණාමය වෙනස් වෙලා තියෙන්නේ.. සත්තු වෙනුවට ශාඛ, ගල් වගේ දේවල් බුද්ධිමත් ව, චලනය වෙන්න පුළුවන් වෙලා තියෙද්දී සත්තු විතරක් ඇයි ඒක තැන පැලවෙන නිෂ්ක්‍රිය ජාතියක් වෙලා තියෙන්නේ..

අවංකවම බැම්බු මට ඒක හිතාගන්න බෑ...  සමහරවිට අපිට නොතේරෙන දේවල් නිසා ඒක එහෙම වෙන්න ඇති..

හැබැයි මම එක දෙයක් හොයා ගත්ත කියල මට හිතෙනවා...

අපි මේ ඔහේ වර්ගයා බෝ කර කර ඉන්න එක කවදාවත් ඉවරයක් වෙන දෙයක් නෙවෙයි.. ඒ කියන්නේ අපිට අවශ්‍යය කරන මුලික අමුද්‍රව්‍ය ටික ලබා ගන්න පුළුවන් තාක්කල් අපි ඔහේ ඇති වෙයි, කාලයක් ඉඳල පුළුවන් තරම් අපේ වර්ගේ අය බෝ කරලා මැරිලා යයි.. ආයෙත් අපි හැදෙයි.. මේක හැමදාම චක්‍රා කාරව සිද්ධ වෙයි කියල හිතිලා නැද්ද..?

හ්ම්... ඕක ගැන ඉතින් කතා කරලා වැඩක් නෑ බෝ... අපි මේ ඔහේ දුවන්නම් වාලේ දුවනවා.. එක්කෝ අපිට හැකියාවක් නෑ ඕක නවත්තන්න.. නැත්නම් අපි ඒක කරන විදිය දන්නේ නෑ... මම ගොඩක් වෙලාවට ඔය ගැන කල්පනා කරනවා.. හැබැයි උත්තරයක් හොයා ගන්න හරි අමාරුයි... නා පැවසුවේය..

තානායමේ එළියෙන් දඩ බඩ හඬින්  නැගෙන ශබ්දය ඔවුනට ඇසුනද ඔවුහු නෑසුකන්ව සිටියෝය..

අවංකවම මට නම් ඔය ගැන ඒ හැටි ප්‍රශ්නයක් නෑ.. මම මේ තියෙන දෙයක් කාල බීලා කාටවත් කරදරයක් නැතිව ඉන්න කොස් ගහනේ... පුළුවන් තරම් කොස් පැල ටිකක් බෝ කරලා ඔහේ මැරිලා යන්නයි මට ඕනේ.. ආයේ හැදෙනවා ද නැද්ද.. ඔව්ව කවුද අයිසේ දන්නේ.. ජැක් සිනාසෙමින් පැවසුවේය..
 
හ්ම්ම්ම් මමත් එච්චරම ඕක ගැන හිතල තිබුනේ නෑ.. අපි ඉතින් කොහොමත් එක පඳුරට හැදිලා ඔහේ හුළඟට වැනි වැනි ඉන්න කැමති ජාතියනේ.. නමුත් මේ කතාව නිසා මට අවංකවම ඒ ගැන හිතල බලන්න හිතෙනවා ඉතින් මිස්ට බෝ මොකක් ද දැන් හොයා ගත්තේ.. බැම්බු ඇසුවේය..
 
ඔය මිනිස්සුන්ගේ  ඉහළ කොටසේ තියෙන සිහියක් ගැන මම කිව්වා නේද.. මට හිතෙනවා අන්න ඒ සිහියේ උපරිම මට්ටමට ළඟා වෙන්න පුළුවන් උනොත් .............................

මිස්ට බෝ..... තානායම කෙළවරින් නැගුනු ගැඹුරු කටහඩ නිසා සියල්ලෝම ඒ දෙස බැලීය..
 
දැවැන්ත දේවදාර නිලධාරියෙක් බෝ දෙසට එමින් සිටියේය.. මිස්ට බෝ... කරුණාකර කට වහන්න.. මම සම්පුර්ණ කතාව අහගෙන හිටියේ.. අර උඩ තියෙන ඩ්රෝන යානයේ සියලුම දේ පටිගත වෙලා තියෙන්නේ.. නීතිවිරෝධී මිනිස් පරීක්ෂණ ගැන ප්‍රචාරය කිරීමේ වරදට අපි ඔබව ගස්තඩන්ගුවට ගන්නවා.. ඔබට පුළුවන් නිස්ශබ්ධව සිටින්න.. ඔබ කියන ඕනෙම දෙයක් ඔබට විරුද්ධව අධිකරණයේ දී යොදා ගන්න ඉඩ තියෙනවා..   
 
ඒ සමගම තානායමට ඇතුළු වුනු කබොක් සහ කළු ගල් පොලිස් නිලධාරින් විසින් ඔවුන් සිටි මේසය වට කර ගත්තෝය...



ප.ලි

විකාරයි වගේ නම් සමාවෙන්න.. ඔළුව කචල් ගියාම ඔහොම තමයි ඉතින්.. හෙහ් හෙහ්

මේ කතාවෙ තියෙන සංකල්පය තියෙන කතාවක් මම 2004- 2005 කාලේදී පරිගණක සඟරාවට ලිව්වා.. ඒක ඒ දවස් වල එකේ පලවෙච්ච කතා අතරින් හොඳ කතාවක් විදියට තේරුනා..නමුත් ඒක මේකට හාත්පසින් ම වෙනස් බොහොම සරල කතාවක්..මේ සත්තු ගස් මාරු වීමේ අදහස විතරයි එකේ තිබුනේ කතාව මේක නෙවෙයි..

ඊට පස්සේ ඒ කියන්නේ අවුරුදු 10කට විතර පස්සේ මම ලියපු පළවෙනි කතාව මේ.. දෙතුන් පාරක් කියවද්දී මටම නිකන් චාටර් වගේ..

හැමදාම අනිත් අයගේ කතා කියවල රසවිඳින එකේ පුළුවන් විදියට මොකක් හරි ලියන්න ඕනේ කියල හිතල ඔන්න ඔහේ ලියල දැම්මේ .. :)

Wednesday, September 16, 2015

සිඳුලෝලී සේලරුවා හෙවත් මොන මගුලේ කතාවක් ද

සාහිත්‍ය මාසේ ඇවිල්ල පොත් ප්‍රදර්ශනෙත් එන හින්ද පොතක් ගැන මොකක් හරි ලියන්න හිතුවා.මේ සැරෙත් ප්‍රදර්ශනේ මිස් වෙනවා හැබැයි හිතට දුක නෑ මොකද අපිව බලා ගන්න වෘක රාළහාමි ඉන්නවනේ. වෘක රාළහාමි මේ අවුරුද්දෙත් එක පාරක් ආවා. මම හිතන්නේ ආයේ එයි. හිතේ දුක යන්නත් එක්ක මැලේසියාවට ඇවිල්ල ගෙවුණු අවුරුදු 2ක ඇතුලත ගත්ත පොත් ටිකේ ෆොටෝ එකක් දාන්නම්කෝ. 





හෙහ් හෙහ් අම්ම ගහයි බැට් එකෙන් නේද? 

ඔය උස ගොඩේ තියෙන ඔක්කොම පොත් මේ පහුගිය අවුරුදු 2කෙ ගත්තුව. මිටි ගොඩේ තියෙන්නේ ලංකාවෙන් ගෙනාපු සිංහල පොත්. තව සිංහල පොත් ටිකක් තිබුනා ඒ ටික අදින්න කම්මැලි නිසා පොටෝ ගත්තේ නෑ.  සිංහල පොත් වලින් නම් එකක් දෙකක් ඇරෙන්න ඔක්කොම ටික කියෙව්වා. දෙවෙනි වර හෝ ඊට වැඩි වාරයක් ආතල් ඒක පිණිස කියවන්න තමයි ගොඩක් ඒවා ලංකාවෙන් අරන් ආවේ. 

උඹ දැන් මේකෙන් කීයක් කියෙව්වද වගේ නොහොබිනා ප්‍රශ්න අහන්න එපා. මේවා මේ අනාගත ඉන්වෙස්ට්මන්ට් විදියට එකතු කරන්නේ. අනාගත ඉන්වෙස්ට්මන්ට් කියන්නේ හදිසියේ කරන්න මෙලෝ වැඩක් නැති වුනොත් කියවන්න තියෙන වත්කම් කියල හිතාගෙන. ඒ කියන්නේ දැන් ඔන්න එකපාරටම කරන්ට් එක නැති වෙලා, ඉනටර්නෙට් නැති වෙලා,  ඔෆිස් නිවාඩු දීලා, එලියට බහින්න බෑ වැස්ස/ ගංවතුර වගේ සිද්දි ගොඩක් වෙලා ගෙදර නන්නත්තාර වෙන්න සිද්ද වුනොත් ඔන්න මේ පොත් ගොඩේ වටිනාකම තේරෙන්න ගන්නවා. 

මම මේ ඊයේ පෙරේදා දවසක් ඔය ගැන කල්පනා කළා. ඒ කියන්නේ ඔය විදියට ගේ ඇතුලට වෙලා ඔහේ කරන්න මෙලෝ වැඩක් නැතුව ඉන්න එක ගැන. මිට අවුරුදු 15-20කට විතර කලින් නම් මගේ දවස් ගොඩක් ගෙවුනේ ඔන්න ඔහොම.  වැස්ස ගංවතුර නැති වුනත් ගෙදර කරන්ට් එක තිබුනත් කරන්න මෙලෝ වැඩක් නැති ළමා කාලයක් තිබුනනේ. ඒ දවස් වල අම්මයි තාත්තයි වැඩට ගිහින් අක්කත් ඔය පන්ති හරි කොහේ හරි ගියාම මට කරන්න මෙලෝ වැඩක් නැති වෙනවා. යාලුවෝ හිටියොත් හරි සමහර වෙලාවට උනුත් ඔය එහාට මෙහාට වෙලා මොකෙක්වත් නැති දවස්. ගොඩක් වෙලාවට ඕක වෙන්නේ ඉස්කෝලේ නොගිහින් ඉන්න දවස් වලට. ටීවී එකෙත් බලන්න කියල ඒ හැටි දෙයක් නෑ. ඉන්ටර්නෙට් හෝ කොම්පියුටර් කියන්නේ තනිකරම අදාල නැති දන්නෙවත් නැති දේවල්. එතකොට ගෙදර ඉතිරි වෙන්නේ ඔය ගෙනාපු පොත් පත්තර තමයි. ඒ දවස් වල එක්කෝ පොතක් කියවනවා. නැත්නම් චිත්‍රයක් අඳිනවා. එහෙමත් නැත්නම් ඔය සර්කිට් කෑල්ලක් අටවනවා. ඔය ටික තමයි දවස ගෙවා ගන්න උපකාරී වුනේ. හොඳ පොතක් අතට අහු වුනාම කන්න බොන්න ඕනෙත් නැතුව නිකන් ම දවස ගෙවිලා යනවා. අන්න එහෙම කාලයක් බැරිවෙලාවත් ආයේ ආවොත් කියවන්න තමයි මම ඔය පොත් එකතු කරන්නේ.. හෙහ් හෙහ් 

හරි දැන් ඔහොම කියපු පොත් හැට හුටහමාරක් අතරෙන් මෙච්චර කාලෙකට කියවපු මෙලෝ රහක් නැති පොත ගැන මොකක් හරි කොටන්න හිතුනා. මොකද ඉතින් නොකා නොබී කියවන පොත් වගේම මොන මගුලට කියෙව්වද කියල හිතෙන පොතුත් තියෙනවනේ.

වැඩි විස්තර ඕනේ නෑ. මිට අවුරුදු 3,4,5,6 කට කලින් ඔය පොත් ප්‍රදර්ශනෙන් ම අරගෙන මෙච්චර කාලයක් තිස්සේ පොත් ගොඩේ එහෙ මෙහෙ වේවි, අන්තිමට මැලේසියාවටත් ආපු මෙන්න මේ පොත දැන් සති 2-3කට කලින් මම කියවල ඉවර කළා. ඉවර වෙච්ච ගමන් මට හිතුනේ මොකක් ද දන්නවා ද  

"මොන මගුලේ කතාවක් ද මේ.. "

හරි මේ තියෙන්නේ පින්තුරේ. 


පින්තුරේ දැක්කම හිතෙන්නේ පොඩි 18+ හැඟීමක් නේද

ඔබ හරි.  මේ කවරයේ කතාව කියෙව්වම ඒක මහ අප්සට් 18+ කතාවක් ද කියල හැදිච්ච වැදගත් අයට හිතෙයි. 

මේ තියෙන්නේ කතාව කෙටියෙන්.

හරි දැන් මේක මුල් පිටු ටික කියවද්දී පොඩි මෙව්වා එකක් තියෙනවා. පොඩි අප්සට් ගතියක් දැනෙනවා. මොනවා උනත් අපි හැදිච්ච ළමයි නිසා. 

ටික වෙලාවක් යද්දී ඉතින් තව පොඩි විකාර කැල්ලක් තියෙනවා ඊට පස්සේ ඉතින් ඔය සාමාන්‍ය කතාවක් බවට පත්වෙනවා. ඒ කියන්නේ අමුතු දෙයක් නැති නිකන්ම නිකන් කතාවක් නිසා. කොහොම හරි අන්තිම පිටු ටික කියවල අවසාන පිටුවේ අන්තිම ටික කියවල ඉවර වෙද්දීම හිතෙනවා

"මොන මගුලේ කතාවක් ද මේ.. " කියල

මේ පොත කියවල තියෙන මිට වඩා වෙනස් හැඟීමක් දැනිච්ච අය ඉන්නවා ඇති. මේක සැහෙන්න හොඳ පොතක් විදියට තමයි කර්තෘ සටහන එහෙම තියෙන්නේ. එක්කෝ මගේ රස නහර මේ මැලේ කෑම වල තියෙන මෙලෝ රහක් නැති ගතියට හුරු වෙලා මට මේ පොතේ තියෙන නියම අදහස තේරෙන්නේ නෑ. එහෙම නැත්නම් අනේ මන්ද කොහොම හිතුවත් මට හිතෙන්නේ "මොන මගුලේ කතාවක් ද " කියල 



Tuesday, August 25, 2015

සොෆ්ට් සරණිය - පොතේ විදියට සොෆ්ට්වෙයාර් එකක් හදන හැටි

අද සොෆ්ට් සරණිය වැඩසටහනින් මම ඔයාලට කියල දෙන්න යන්නේ සොෆ්ට්වෙයාර් එකක් පොතේ විදියට හදා ගන්න හැටි.

මුලින්ම අවශ්‍ය ද්‍රව්‍යය
  1. සොෆ්ට්වෙයාර් (මෘදුකාංගය) එකක් හදන්න අවශ්‍යතාවයක් හෝ අවශ්‍යතාවයක් ඇති පුද්ගලයින් (Client) - 1යි
  2. එයින් ලබා ගත හැකි ප්‍රයෝජන, නැත්නම් ලාභය, කුමන අය වෙනුවෙන් ද, කුමක් සඳහාද  යන ආදී දේවල් ගැන හොඳ අධ්‍යයනයක් කර ලබා ගත්ත දත්ත - හැකිතරම්
  3. මෙම මෘදුකාංගය කුමන මාධ්‍යක් සඳහා බාවිතා වෙනවද කියන තීරණය. ඒ කිව්වේ වෙබ් අඩවියක් විදිහට ද නැත්නම් ඩෙස්ක්ටොප් එකේ බාවිතා කරන්නද නැත්නම් ජංගම උපකරණ ආදියට ද එහෙම නැත්නම් වෙන උපකරණ, වාහන ආදී දේ ට ද යන්න ගැන -  හරි තීරණ 1යි
  4. ඒ සඳහා මොන මොන විදියේ තාක්ෂණික දේවල් බාවිතා කරනවද යන තීරණය (Development Languages/Platforms etc). මේක තීරණය කරන්න ඉහත සඳහන් 1,2,3 යන කරුණු ගැන තීරණය කරලා තියෙන්න ඕනේ - හරි තීරණ 1යි
  5. පුද්ගලයින්  - අවශ්‍ය තරම්
  6. උපකරණ සපයා ගැනීම උදා : අවශ්‍යය කරන පරිගණක යන්ත්‍ර, ඉන්ටර්නෙට් සම්බන්ධතා සහ වැඩ කරන පුද්ගලයින් සඳහා අවශ්‍ය අනෙකුත් පහසුකම් -  අවශ්‍ය තරම්
  7. වියදම් සඳහා මුදල් -  මිලියන වලින් කීපයක් සුදානම් කරගන්න

අවශ්‍යය පුද්ගලයින් ලැයිස්තුව
  1. සම්පුර්ණ ව්‍යාපෘතිය කළමනාකරණය කල හැකි කළමනාකරුවෙක් හෝ අදාල අංශ කළමනාකරණය සඳහා ඒ ඒ අංශ පිළිබඳව දැනුම සහ පළපුරුද්ද ඇති කළමනාකරුවන් කිහිප දෙනෙක්.
  2. මෘදුකාංගය එක සැදීම සඳහා අවශ්‍යතාවය ඇති පුද්ගලයා හෝ ආයතනය සමග කෙලින් සම්බන්ධ විය හැකි පුද්ගලයෙක් හෝ කීප දෙනෙක් (සංකීර්ණ තාවය අනුව)
  3. අදාල මෘදුකාංගය එක ගැන නියමිත විදියට විශ්ලේෂණය කල හැකි ඒ පිළිබඳව දැනුම ඇති  (Business Analysts වරුන් ) අවශ්‍ය තරමට
  4. අදාල මෘදුකාංගය තාක්ෂණිකව නිමවීම පිළිබඳව සැලසුම් සැකසීම එක පිළිබඳව දැනුමැති පුද්ගලයින් (Solution/Software Architects)එක් අයෙක් හෝ කිහිප දෙනෙක්  (සංකීර්ණ තාවය අනුව)
  5. එම තාක්ෂණික සැලසුම අනුව වැඩ කල හැකි ඒ ඒ තාක්ෂණික පැති ගැන දැනුම සහ පළපුරුද්ද ඇති ඉංජිනේරුවන් (Tech Leads/Senior/Junior Software Engineers) අවශ්‍ය තරමට
  6. මෘදුකාංගය සඳහා අවශ්‍යය දත්ත ගබඩාකරණය සහ කළමනාකරණය ගැන දනුම සහ පළපුරුද්දද ඇති ඉංජිනේරුවන් (Database Administrators) අවශ්‍ය තරමට
  7. අවශ්‍යය පරිගණක ජාල, පරිගණක සහ වෙනත් තාක්ෂණික උපකරණ නඩත්තු කටයුතු සඳහා දැනුම සහ පළපුරුද්ද සහිත ඉංජිනේරුවන් (System/Network  Administrators) අවශ්‍යය තරමට
  8. මෘදුකාංගය සඳහා අවශ්‍ය වන ග්‍රැෆික් නිර්මාණ සහ වෙනත් ශ්‍රව්‍ය දෘෂ්‍යය නිර්මාණ සඳහා ඒ පිළිබඳව දැනුම ඇති නිර්මාණකරුවන් අවශ්‍ය තරමට
  9. මෘදුකාංගයේ තත්ත්ව පරීක්ෂණය සඳහා ඒ පිළිබඳව දැනුම පළපුරුද්ද ඇති ඉංජිනේරුවන් (Quality Assurance Engineers) අවශ්‍යය තරමට
  10. මෘදුකාංගය අවසන් තත්ත්ව පරික්ෂා වලින් පසුව පාරිහොගිකයා වෙත ලබා දීම සඳහා නිදහස් කිරීමට අදාල කටයුතු කිරමට දැනුම සහ පළපුරුද්ද ඇති ඉංජිනේරුවන් (Release Engineers)  අවශ්‍යය තරමට
  11. මෘදුකාංගය වෙළඳ පොළට නිකුත් කරන්නේ නම් ඒ පිළිබඳව දැනුම සහ අවබෝධය ඇති පුද්ගලයින් (Sales/Marketing) (මේ අය මුල් අවදියේදී අවශ්‍ය නැත)
  12. සම්පුර්ණ කාලය තුල ආයතනයේ අනෙකුත් කටයුතු සඳහා අවශ්‍ය කරන පුද්ගලයින් (Human Resource/කා.කා.ස වරුන් ආදිය)
  13. මෘදුකාංගය නිපදවීමේදී ඇති පොඩි පොඩි වැඩ සහ කල් ගතවන, ඉංජිනේරුවන් ගේ කාලය අනවශ්‍ය විදියට වැය වන වැඩ කරවාගැනීම සඳහා විශ්ව විද්‍යාල වලින් පිටවන නවකයින් කිහිප දෙනෙක්. මෙවැනි නවකයින් පුහුණු කිරීමෙන් ඔබට මහත්ඵල මහානිසංස ලැබෙන පිං සිදුවේ.

සාදා ගන්නා ආකාරය

මුලින්ම මෘදුකාංගය සැදීම සඳහා ඇති අවශ්‍යතාවය ගන්න. 

ඉන්පසු එම අවශ්‍යතාවය පිළිබඳව මෘදුකාංගයේ ව්‍යාපාරික ස්වභාවය විශ්ලේෂණය කිරීමට හැකි ඒ පිළිබඳව සුදුසුකම් සහ පළපුරුද්ද සහිත Business Analysts වරුන් සහ අදාල පාර්ශව සමග සාකච්චා වට කිහිපයක් පවත්වන්න. මෙහිදී Software Architects, Tech Lead ලා ගේ සහය ලැබීම ද වැදගත් විය හැක.

මෙසේ හොඳින් සාකච්චා කිරීමෙන් පසු Business Analysts වරුන් විසින් මෘදුකාංගයේ ඒ ඒ කොටස් සඳහා අවශ්‍යය කරන තොරතුරු, ක්‍රියාමාර්ග, පරිශීලකයින්, නිපදවීමට පෙර තිබිය යුතු අවශ්‍යතා, නිපයුමින් පසු කෙසේ විය යුතු ද යනාදී දේ ඇතුලත් වාර්තා පිළියෙළ කරනු ඇත. මේ සඳහා මාස කීපයක් ගත විය හැක.
එසේම වරින් වර විවිධ සාකච්චා වට පැවැත්වීමට සිදුවේ.

මේ අතර තුර මුලින් තීරණය කරගත් තාක්ෂණික කටයුතු පිළිබඳව ඉංජිනේරුවන් පුහුණු කිරම, ආයතනයට අවශ්‍යය පරිගණක ජාල, වෙනත් සේවා මෘදුකාංග Source Control / Version Control/ Backup   ආදිය පිහිටුවීම, ඒවා පිළිබඳව පුහුණු කිරීම් කටයුතු මේ කාලය තුල පටන් ගත යුතුය.   

මේ අතර සම්පුර්ණ පද්ධතියේ තාක්ෂණික  සැලසුම Software Architecture එකේ  මුලික අදියරේ වැඩ ඔබට ආරම්භ කල හැක.

එසේම අවශ්‍යය කරන මෘදුකාංග පිහිටුවීමේ කටයුතු, ඒවා ට ආදාළ පරිගණක යන්ත්‍ර/සර්වර් ආදිය නිවැරදිව පිහිටුවීම ද කල යුතුය.  

මේ කටයුතු සඳහා ද මාස කිහිපයක් ගත වනු ඇත. මෙහිදී ඉංජිනේරුවන්ගේ කාලය නියමිත විදියට යොදාගැනීමෙන් ඔවුන් ෆේස්බුක්,යු ටියුබ් , ෆිල්ම්, බ්ලොග් ලිවීම් ආදියට ගත කිරීම අවම කරගැනීමෙන් ඔබගේ මුදල් ඉතිරි කර ගත හැකිය. නමුත් එවැනි සමාජ මාධ්‍ය සියල්ල බ්ලොක් කිරීමේන් ද ඉංජිනේරුවන්ගේ කාර්යක්ෂමතාවය අඩු විය හැකිය. එසේම තාක්ෂණික තොරතුරැ සෙවීම සඳහා ඔවුන්ට නිදහස දීමද, Skype, Google වැනි චැට් පහසුකම් සැලසීම ද වැදගත් ය. මේ සියල්ල බ්ලොක් කර වැඩ ගැනීම කිසිවිටෙක නොකළ යුතුය. මක්නිසාද යත් බොහෝ ඉංජිනේරුවන් මාස 2-3කින් හින් සීරුවේ අස් වී යාම මේ හේතුවෙන් සිදුවිය හැකිය.

අනෙකුත් දත්ත කළමනාකරණ , ජාල කළමනාකරණ, තත්ත්ව පරීක්ෂණ, ග්‍රැෆික් නිර්මාණ ආදී කටයුතු වලද මුලික අදියරේ පුහුණු වීම් / නියමිත මෘදුකාංග පිහිටුවීම් ආදිය මේ කාලය තුලදී සිදුකරන්න. මේ සඳහා නියමිත ලෙස කළමනාකරුවන් යොදාගන්න.

ජනතාවට විහිළු සපයන කළමනාකරුවන් යොදා ගැනීමෙන් ඔබගේ කාලයත් මුදලත් නිකරුනේ නාස්ති විය හැකි බව කරුණාවෙන් සලකන්න

මින් පසු හොඳින් සකස් කරගත් මෘදුකාංගයේ අවශ්‍යතා  සහිත වාර්තා (Software Requirement Specification/Business Requirement Book) ගෙන ඒවා නියමිත ලෙස කොටස් වලට බෙදා ගන්න.  ඒ ඒ කොටස් කණ්ඩායම් නායකයින් වෙත පවරා දී ඒ ඒ කොටස් නිර්මාණය කිරීම සඳහා නියමිත පරිදි Dead Line ලබා දෙමින් කොටසින් කොටස මෘදුකාංගය සැදීම පටන් ගන්න.

මෙසේ ඒක එක කොටස් සෑදීම ඉතා ඉවසිමෙන් කල යුතුය. හැමවිටම ප්‍රධාන සැලසුමට අනුව ,අනාගතයට අවශ්‍යවන වෙනස් කම් කිරීමට හැකි වන අයුරින් එසේම ආරක්ෂාව, කාර්යක්ෂමතාවය , දත්ත වල නිවැරදි භාවය ආදී කරුණු ගැන සැලකිලිමත්ව කළයුතුය. එසේ නොමැති වුවහොත් පසු කාලින ගැටළු වලට මුහුණ දීමට සිදුවේ. 

එසේම මෘදුකාංගයට අදාල සියලුම ඛෙත (Programming Codes) නිවැරදි ලෙස සුරක්ෂිත කර ගත යුතුය.මේ සඳහා ඔබට කලින් පිළියෙළ කරගත්  Source Control / Version Control/ Backup ආදිය බාවිතා කල හැක.

එසේම ඉංජිනේරුවන් විසින් සංවර්ධනය කරන ඛේත  (Code) වල තත්වය උසස් ලෙස තබා ගැනීම සඳහා නිතර Code Reviews කළ යුතුය. 

මේ ආකාරයෙන් මාස කිහිපයක් බොහෝවිට මාස 6- අවුරුදු 1,2 ක් තිස්සේ සංවර්දනය වන එක එක කොටස් නිවැරදි ලෙස තත්ත්ව පරික්ෂා කරන්න. බොහෝවිට ඒ ඒ කොටස් එකිනෙකට සම්බන්ද කර අවසන් පද්ධතියේ විවිධ වර්ෂන් පරික්ෂා කිරීම සිදු කළ යුතුය.

මේ අතර තුර ඔබ විසින් පෙරසුදානම් කරගත් මුදල් අවසන් වුවහොත් බැංකු ණයක් හෝ ලබාගෙන නියමිත වෙලාවට පඩිගෙවිය යුතු බව සිහිතබා ගන්න. පිං තකා සොෆ්ට්වෙයාර් ලියන පිංවතුන් මින් පෙරද සිට නැත මින් මතුවටද නොසිටිනු ඇත.

මේ කාලය තුල Business Analysts වරුන් හා මෘදුකාංග ඉංජිනේරුවන් අතරද මෘදුකාංග ඉංජිනේරුවන් හා Quality Assurance ඉංජිනේරුවන් අතරද ගැටුම් සහිත ස්භාවයක් වර්ධනය විය හැකි බව කරුණාවෙන් සලකන්න. Business Analysts වරුන් හා Quality Assurance ඉංජිනේරුවන් එකතු වී මෘදුකාංග ඉංජිනේරුවන්ට කචල් දැමීමද නිතර දැකිය හැකි තත්වයකි. මෙවැනි තත්ත්ව සමනය කිරීම සඳහා කොකා කෝලා, පිට්සා ආදිය යොදා ගත හැකිය.

ඉන්පසු මෙසේ සකස් කල ගත් මෘදුකාංගයේ මුලික වටයේ වර්ෂන් එකක් Release Engineers වෙත බාරදී නියමිත පරිදි පද්ධතිය Live යාමට අවශ්‍ය පසුබිම සකස් කරන්න. මෙහිදී Release Engineers වරු බබ්බු ලෙස හැසිරෙන අවස්ථා ඇති බැවින් මෘදුකාංගයේ සියලුම අංශ පිළිබඳව අවබෝධය ඇති Tech Leads/Senior Software ඉංජිනේරුවරයෙක් ඒ කටයුතු සඳහා එකතු කරගන්න. මෙසේ කිරීමෙන් ඔබට අවසන් අවස්ථාවේදී සිදුවිය හැකි චාටර් කේස් අවම කර ගත හැක. (චාටර් කේස් කිසි දිනෙක 0 නොවන බව මතක තබා ගත යුතුය)

මේ අතර තුර මෘදුකාංගය බාවිතා කිරීම, තාක්ෂණික තොරතුරු, දත්ත ගබඩා ආදිය පිළිබඳව නියමිත පරිදි Documentation සකස් කළ යුතුය. මේ සඳහා හරි නම් Documentation Specialists වරු සිටිය යුතු වූවද ඉහතදී බඳවා ගත් නවකයින් ලවා මෙවැනි වැඩ කරවා ගත හැකිය.  දැනුම ඇති ඉංජිනේරුවරයෙකුගේ අධීක්ෂණය යටතේ මේවා Review කළ යුතුය. 

මේ ආකාරයෙන් නියමිත ලෙස සකස් කරන ලද මෘදුකාංගය දැන් Live යැවීමට සියල්ල සුදානම් දැයි සැක සංකා රහිතව දැන ගන්න  ( සැක සංකා කිසි දිනෙක 0 නොවන බව මතක තබා ගත යුතුය) 

අවසන් වශයෙන් ඔබ විසින් මෙපමණ කාලයක් තිස්සේ අතේ තියෙන තඹ පිච්චිය පවා වියදම් කර, නයිට් ගසමින්, කොකාකෝලා බොමින් පිට්සා කමින් සාදන ලද මෘදුකාංගයේ අවසන් වර්ෂන් එක හෝ ලයිව් යන URL එක ඔබ අදහන ආගම සිහි කර ඔබගේ සේවා දායකයා වෙත ඉතා සැලකිල්ලෙන් ලියා අවම වශයෙන් 10 පාරක් වත් කියවූ ඊමේලය යවා දඩ බඩ ගා ඔබගේ පරිගණකය වසා ගෙදර යන්න. (ඔබගේ ජංගම දුරකතනය ක්‍රියාවිරහිත කිරීම ඔබට සහනයක් වනු ඇත)


ට්‍රින් ට්‍රින් ට්‍රින්.......

සමාවෙන්න, මෙන්න දැන් අපගේ කියවන්නෙක්  අපවෙත සජීවී ලෙස දුරකථන ඇමතුමක් ලබා දෙනවා. කරුණාකර අමතන්න. "මේ මහත්තයෝ මම මේ කොකිස් කඩේ හන්දියෙන් කතා කරන්නේ සේතන් කියල කෙනෙක් ... ඇහෙනවද? හලෝ සමාවෙන්න මොන තන් ද? කරුණාකර නම කියන්න.... "මම මේ සේතන් සේ තන්..." ආ හරි හරි සේතන් මහත්මයා කරුණාකර ඔබගේ ගැටලුව ඉදිරිපත් කරන්න

"මේ මහත්තයෝ ඔහෙලට පිස්සු ද හැබෑට.... මිලියන ගානක් අතේ තියෙනවනම් අවුරුදු ගානක් චාටර් වේවි ඔය සොප්ට්වෙයාර් හදන්නේ මොකටද.. අනිත් එක ඔහෙලා හිතුවද මෙතන UNP ආණ්ඩුවක් ආපු ගමන් අපිට මිලියන ගණන් සල්ලි හම්බ වෙනවා කියල .. කරුණාකර ප්‍රශ්නය කෙටියෙන් ඉදිරිපත් කරන්න බලන්න.. හරි හරි කෙටියෙන් තමයි මේ කියන්නේ... ඉස්සෙල්ල එයාල හම්බකරගෙන පස්සේ නේ ඉතින් අපට කියක් හරි හොයා ගන්න වෙන්නේ.. මේ එහෙම නෙවෙයි මහත්තයෝ බැරිද ඔය අපිට අඩු වියදමෙන් ගෙදර ඉඳන් ඔය මොකක් හරි එකක් අටවල කීයක් හරි හොයා ගන්න විදියක් කියන්න...නිකන් මෙතන බොරු වැඩ ගැන කියල අපේ කාලේ කන්නේ නැතුව... " 

"ඔව් බොහොම ස්තුතියි සේතන් මහත්මය... ට්‍රින් ට්‍රින් ට්‍රින්.......ආ මෙන්න තවත් කියවන්නෙක් අපට දුරකථන ඇමතුමක් ලබා දෙනවා.... අමතන්න.. කවුද මේ... හලෝ හලෝ හලොඕ ... ඇහෙනවද... ඔව් අමතන්න.. හරි හරි මම මේ මීගමුවේ ඉඳල ගලබොඩ අප්පුහාමි කියල කෙනක් කතා කරන්නේ... සමාවෙන්න ගලබොඩ කව්රු...නෑ නෑ නාන සාදු නෙවෙයි මම ගලබොඩ අප්පු හාමි.. හරි හරි ඔව් අප්පුහාමි මහත්තය මොකක් ද ඔබේ ගැටලුව.."

"මේකයි මහත්තයෝ මම මේ අපේ මායියත් එක්ක මිගමු පැත්තේ පොඩි ඉස්සෝ ටිකක් වගා කරගෙන ඉන්නේ.. මටත් ආසයි ඔය සොස්ට්වෙයා එකක් හදන්න.. බැරිද ඕක ගෘහ කර්මාන්තයක් නැත්නම් මේ ස්වයං රැකියාවක් විදියට අඩු ගානට අපේ ගෑනිටයි මටයි ඕනනම් ඔය තව කොල්ලෙක් දෙන්නෙක් දාගෙන කරන විදියක් කියා දෙන්න. අපි මේ කාටවත් කරදරයක් නැති අහිංසක මිනිස්සු. ඔය හැටි සල්ලි විසි කරලා ඔච්චර විච්චුරන නටන්න අපිට බෑ නෙව. එහෙනම් තියන්නං ඈ..."

ඔව් අපි දැන් ප්‍රධාන පාලක මැදිරිය වෙත මදකට යොමු වෙමු...




Tuesday, August 04, 2015

නැවතීමට මඟ පෙන්වූ ගුරුතුමාට - A tribute to a great teacher

සාමාන්‍ය ළමා කාලයක් සහ ජීවිතය ගැන ගැඹුරු වැටහීමක් නැති යොවුන් සමයක් පසුකරමින් පැමිණි මට ජීවිතය ගැන බොහෝ දේ සිතීමට මාගේ පියාගේ හදිසි වියෝව හේතු වූ බව කිව හැකිය. දරා ගැනීමට අතිශය අපහසු වූ ඒ වියෝව කෙසේ හෝ දරාගත යුතු බව තේරුම් ගෙන ජීවිතය සාමාන්‍යය පරිදි ගෙවීමට අප පුරුදු වී සිටියෙමු. ආර්ථික ගැටළු,අධ්‍යාපනික ගැටළු සහ අනෙකුත් ලෞකික ජීවන ගැටළු සමඟ ගෙවී ගිය තරුණ කාලය තුළ හුදෙකලා වූ හැමවිටම ජීවිතය ගැන අවබෝධකර ගැනීමට, තේරුම් ගැනීමට මම උත්සාහ කළෙමි. අනෙකුත් ලෞකික ගැටළු බොහෝවිට ඒ සිතීම වැඩි කිරීමට මිස අඩු කර ජීවිතය සතුටු කිරීමට එතරම් හේතු නොවීය. සාම්ප්‍රදායික ආගම තුළින් නොලැබෙන යම් කිසි සහනයක අවශ්‍යතාවක් බොහෝ විට දැනුනි.

බුදුදහම ඇදහීම සම්බන්ධයෙන් නිවස තුළ වූයේ ද මැද පිළිවෙතක් නිසා ආගම ගැන එතරම් භක්තියක් කුඩා කල සිටිම නොතිබූ නමුත් බුදු දහමේ සඳහන් වූ සමහර කරුණු ගැන  මගේ සිත පැහැදී තිබිණි. නමුත් එම කරුණු ප්‍රායෝගික ජීවිතයට යොදාගැනීම ගැටළුවක් ව තිබිණි. පන්සල කෙරෙහි එතරම් බැඳීමක්  නොතිබූ බැවින් බොහෝ විට දානමානාදී කටයුතු වලදි පවා එය තවත් එක් වැඩක් ලෙස කරනවා මිස ඊට එහා ගිය ගෞරවයක් හෝ භක්තියක් සිත තුළ නොතිබිණි. මියගිය පියාට පිනක් සිදුවේ යන චේතනාව පමණක් බොහෝවිට තිබිණි.

මේ අයුරින් කාලය ගෙවී ජීවිතයේ විවිද වෙනස් කම් සිදුවෙමින් යන අතර තුර කුඩා කළ සිටම කියවීමට දැක් වූ ලැදියාව නිසා චරිතාපදාන කියවා ජීවිතය තේරුම් ගැනීමේ පුරුද්දක් මා සතුව තිබිණි. ආචාර්‍යය ඊ.ඩබ්ලිව් අදිකාරම් චරිතය ලාංකික චරිතකතා අතුරින් මගේ සිත්ගෙන තිබිණි. ක්‍රිෂ්ණමූර්ති තුමා ගැන දැන ගැනීමට ලැබී එතුමාගේ පොතපත කියවීමේ උනන්දුවක් ද මේ කාලය වනවිට ඇති වී තිබිණි. අවස්තා කිහිපයකදී ක්‍රිෂ්ණමූර්ති මධ්‍යස්තාන වලට ගොස් දේශන වලට සවන්දීම, පොත පත පරිහරණය, සහ අන්තර්ජාලයෙන් එතුමාගේ දේශන වලට සවන්දීමට ද පුරුදු වී සිටියෙමි. ආගම තුළින් නොලැබෙන සහනය ඒ ජීවන චරිත සහ දේශන තුළ ඇතිබව වැටහී තිබිණි. නමුත් ඒවායේ වූ ගැඹුරුබව ප්‍රායෝගික ජීවිතයට කෙසේ යොදාගත හැකිද යන ගැටළුව හැමවිටම තිබිණි.

මේ අතර එක්තරා දිනෙක ඒ.එස් බාලසූරිය මහතා සමඟ සැදෑ වරුවක් ගතකිරීමේ අවස්ථාවක් උදාවුණි. රූපවාහිනියෙන් එතුමාගේ දේශන අසා තිබුණ නමුත් එදා හවස්වරුවේ එතුමා කතාකළ දෑ තුළ මෙතුවක් නොඇසූ තරමේ නැවුම් බවක් තිබිණි. අපට අහිමි වූ කාලයක ජීවත් වූ ක්‍රිෂ්ණමූර්ති තුමා, අදිකාරම් මැතිතුමා වැනි අයගේ පොතපත කියවන විට දැනුණු සහනශීලී හැඟීම බාලසූරිය මහතාගේ දේශන වල තිබුණි.

එතුමාගේ පොත පත වල සිතීමට බොහෝ නැවුම් කරුණු අඩංගු විය. ඒ කරුණු ගැන අවශ්‍යය ඕනෑම විටෙක කතාබහ කිරීමට තර්ක කිරීමට අවස්තාව ලැබීම අතිශයින්ම වැදගත් විය. හැකි හැමවිටම එතුමාගෙ දේශන වලට සහභාගී වීම පුරුද්දක් බවට පත්විය. බොහෝ කළණ මිතුරන්ගේ ඇසුර ඒ දේශන වලට සහභාගී වීමෙන් ලබා ගත හැකි විය. ජීවිතය පිළිබඳව වෙනස් ආකාරයකින් බැලීම ටිකෙන් ටික ආරම්භ විය. බොහෝ තරුණයින්ට ඇතිවන ලෞකික ගැටළු සහිත ජීවිතය දෙස යම් තරමකින් වෙනස් ලෙස බැලීමට මා පුරුදු විය.

ක්‍රම ක්‍රමයෙන් සිතිවිලි වල සිදුවන වෙනස් කම් නිසා ජීවිතය පහසු වීමක් ටිකෙන් ටික දැනෙමින් තිබිණි. යා යුතු නිවැරදි මාවතට පිවිසි බව මනාව වැටහී තිබිණි. අන් සියළු වැඩ වලට වඩා ප්‍රමුඛත්වයක් ඒ මඟ යාමට දීමට මා පුරුදු විමි. ලෞකික ජීවිතය සුපුරුදු ලෙස ගෙවී ගියේය. එහි කිසිදු කඩා වැටීමක් මේ මඟ යාම නිසා සිදු නොවුණි. සිදු වූ එකම දෙය ගමන පහසු වීම පමණි.

මේ අයුරින් ගෙවුනු වසර කිහිපය තුළ වුවද සැබෑ සහනය තවමත් නොලැබුණු බව දැනී තිබිණි. සැබෑ සහනය ලබාගත යුතු දෙයක් බව සිතා ඒ වෙනුවෙන් උත්සාහ කිරීමට ටිකෙන් ටික මා පෙළඹුනි. භාවනාවෙන් ලැබෙන දෙයක් යැයි ඉගෙන ගෙන තිබූ බැවින් භාවනාවෙන් ලැබීමට උත්සාහ කලෙමි. ලෞකිකව ගෙවන එදිනෙදා ජීවිතය තුළ භාවනාවට එතරම් තැනක් දීමට ප්‍රායෝගිකව අපොහොසත් වීම නිසා බාලසූරිය මහතා නිතර පවසන මේ මොහොත තුළ ඇති ජීවිතය දැකීමට පටන් ගතිමි.

බොහෝ කාලයක් තිස්සේ කෙසේ හෝ ලබා ගන්නට ඕනෑ යැයි සිතමින් කළ උත්සාහය අතහැර දමා, සිදුවන්නේ කුමක් දැයි හැමවිටම අවදියෙන් සිත දෙස බලාසිටින විට ක්‍රම ක්‍රමයෙන් සිත තුනී වී යන බවක් දැණිනි.  2011 වසරේ මැද භාගයේ එක්තරා දිනක රාත්‍රී නින්දට යාමට සැරසි  තවත් ඉතිරි වී ඇති මේ සිතිවිලි රාමුවෙන් ගැලවීමේ අවශ්‍යතාවක් මතුවී සිත දෙස බලා සිටින විට ක්ෂණයකින් පසු පෙර නොවූ ආකාරයේ සැහැල්ලුවක් දැනුන ආකාරයක් මට මතකය. ඉන්පසු ගෙවූ හැම දිනකම මා ජීවත් වූයේ අප්‍රමාණ සැහැල්ලු ස්භාවයකිනි. සිතට එන සියළු සිතිවිලි නෙලුම් පතකට වැටෙන දියබිඳු සේ ගලා ගොස් අතුරුදන් වන ආකරයක් මට දැනෙයි. එදිනෙදා වැඩ වලදී මේ තත්වය නොමැති වූවත් වැඩක් නොකරන සෑම විටම ස්භාවය මෙයයි.

බොහෝ ධර්ම කරුණු සැකයකින්, තර්කයකින් තොරව සත්‍යය ලෙස වැටහී යන ස්භාවයක් පවතී. සමාජ සම්මත යැයි සළකන දේ තුළ ඇති මුලාවන් වැටහෙන ස්භාවයක් ඇති අතර  ජීවිතය අතිශය සැහැල්ලු සහ ඉතා පහසුවෙන් ගලා යයි.  දුක,කණගාටුව, කෝපය වැනි සිතිවිලි විටෙන් විට පැමිණියද ඒවා ඇති බව පසෙක සිට බලා සිටිමින් ඔහේ සිදුවන්නට හැර සිටින ස්භාවයකින් ජීවිතය ගෙවීමට හැකි වී ඇත. ඒ ඒ සිතිවිලි වලට අදාළව ක්‍රියා කිරීම් සිදු කලත් කරන්නේ මොකක්දැයි අවදානයක් සහිත වීම,  විනාඩි කිහිපයකින් නැවත සැහැල්ලු ස්භාවයට පත්වීමට හැකි වීම නිසා එදිනෙදා කටයුතු සහ සබඳකම් ඉතා පහසුවෙන් පවත්වාගෙන යාමට හැකි වී ඇත. බොහෝ විට සිතුවිල්ලෙන් තොරව ඔහේ සිටීමට ඇති කැමත්ත නිසා පෙර කිසි කලක නොවූ ආශ්වාදයක් විදීමට මා පුරුදු වී ඇත. එය අලස කම නොව කිසිවක් නොකර නිදහස් මනසින් සිටීමේ කැමැත්තය. එදිනෙදා අවශ්‍ය දේවල් කිරීමේදී කලයුතු දේ කුමක් දැයි පෙර නොවූ ලෙස වැටහීම සහ සමාජ සම්මත බොහෝ දේ ඇසුරින් අවශ්‍යම දේ පමණක් තෝරා බේරා ගැනීමට සහ   එසේ කිරීමේදී සිදුවන ලාභ අලාභ කෙරෙහිද එතරම් වෙනසකින් තොරව බලා සිටීමට හැකි නිසා බොහෝවිට මිනිසුන් සමඟ කටයුතු කරන විට මහත් පහසුවක් දැනෙමින් පවතී. කිසිවක් මට නොවේ ලෙස සිටීමේ හැකියාව නිසා ජීවිතයේ ගැටළු වලින් මානසික පීඩාවක් ඇති නොවී ඔහේ නතර වී සිටීමේ ආසාව හැම විටම සිත තුළ පවතී.

සිතෙහි මේ පවතින ස්භාවය ගැන ගැඹුරුන් සිතා බලන විට එය ජීවිතකාලය පුරා සෑම දිනම තිබූ තත්වයක් මිස අමුතුවෙන් ලැබූ දෙයක් නොවන බවත් සිදුවී ඇත්තේ මෙතෙක් කලක් වැසී තිබුණු දෙයක් ටිකෙන් ටික නිරාවරණය වී මනාව පැහැදිලි වීමක් යැයි වැටහී ඇත. බාලසූරිය මහතා අමුතු දහමක් හෝ තිබෙන දහම වෙනස් ලෙසකින් හෝ දේශනා නොකර පවතින සත්‍යය ඒ ආකාරයෙන් ම පහදා දීම නිසා මගේ ජීවන දැක්ම වෙනස් විය. 2600 වසරකට පෙර මිනිසුන් ඇසූ ඒ නොකිලිටි සත්‍යයය සහ බාලසූරිය මහතා මේ වත්මනෙහි අපට පහදා දෙන සත්‍යයය අතර වෙනසක් නැති බව මට හැඟේ. විවිධ කඩතුරාවන්ගෙන් වැසී ගොස් ඇති ඒ සත්‍යයය සහ ඒ සත්‍යයය වෙත ළඟා විය හැකි මාර්ගය අපට නිවැරදි ලෙස පෙන්වා දී ලෞකික ජීවිතය තුළම නිදහස ලබා ගත හැකි බව පෙන්වා දුන් ඒ.එස් බාලසූරිය මහතාට මාගේ නමස්කාරය මෙසේ පුද කරමි.

ප.ලි

මේ සටහන මීට ටික කලකට පෙර ඒ.එස් බාලසූරිය මහතාගේ ජීවිතය සහ එතුමා කල සේවය ඇගයිම පිණිස නිකුත් කල කුඩා සමරු පොතක් සඳහා මා විසින් ලියන ලද සටහනකි. ගෙවුණු කාලය පුරාවට ලෞකික බැඳීම් සමග ගෙවී යන ජීවිතය දෙස උපේක්ෂාවෙන් බලා සිටීම නිසා මෙතුමාගෙන් මා උගත් දේ කෙතරම් මගේ ජීවිතය සාර්ථකව ගෙවීමටත් , මිත්‍යාවෙන් පිරුණු මතවාද වලින් බැහැරව පවතින සත්‍යයය එලෙස දැක ආත්ම පුර්ණයට පත්වීමටත් හේතු වූ බවත් අනාගත කාලය වෙනුවෙන් සටහන් කර තැබීමකි.

පෙර සටහන්

බුදු දහම සහ මම හෙවත් මගේ සත්‍යය ගවේෂණය 1 කොටස

බුදු දහම සහ මම හෙවත් මගේ සත්‍යය ගවේෂණය - 2 කොටස


කැමති කෙනෙකුට විමසා බලන්නට

Vimukthi Center For Spiritual Well-Being



Thursday, June 11, 2015

නිකන් ඉන්න ගමන් කරන්න වැඩක් - The quick brown fox jumps over the lazy dog

මේ විස්තරේ මම සම්බන්ධ වෙලා ඉන්න සිංහල යුනිකෝඩ් ගෘප් එකට ලැබුණු පණිවිඩයක්. අපි අතරේ ඉන්න නිර්මාණශීලි, සිංහල දැනුමැති බ්ලොග් කරුවන්ගේ දැන ගැනීම උදෙසා මේ සටහනක් විදියට දාන්නේ. 
මේ තියෙන්නේ සමුහයට ආපු ඊමේල් එකේ තියෙන විස්තරේ.

ඔන්න නිකන් ඉන්න ගමන් වැඩක්... Google Fonts වලට මේ අවුරුද්දේ සිංහල එකතු වෙනවා. එතකොට ඒ ෆොන්ට්ස් පෙන්නන්න අපිට sample text එකක් ඕනේ. English වලට 'Quick Brown Fox, Grumpy wizards make...' වගේ ඒවා තියෙනවා.. සිංහල වලටත් එකක් හදන්න ඕනේ.. වචන 25කට අඩුවෙන් සිංහල වල විවිධ අකුරු හැකිතරම් පෙන්නන එකක් වෙන්න ඕනේ.

- රේපය / රකාරංශය / යංසය තිබය යුතුයි.
- ණ,ෂ, ම, ඩ , ඪ වලින් කිහිපයක්
- හැකිතරම් පිල්ලම්
- හැකිතරම් අකුරු
- දීර්ඝ කොම්බු (කෝ )
- කියවිය හැකි වචන විය යුතුයි
- යම්කිසි තේරුමක් තිබිය යුතුයි.
- ශ්‍රී ලංකාවේ සංස්කෘතියට(පරණ වෙන්න ඕන නැහැ ) සම්බන්ධ යමක් වීම හොඳයි..

මෙතන comment කරන්න,  නැත්නම් මෙතන පොස්ට් කරන්න  :

මේක Google එකට කිසිම සම්බන්ධයක් නැහැ.. නමුත් හොඳම එක Google එකේ use කරාවි. ඔබේ දායකත්වය වෙනුවෙන් කිසිම ගෙවීමක් නැහැ :) නමුත් මේ ෆොන්ට්ස් එලියට දානකොට අපි mooniak හරහා ඔබට ස්තුතිය පලකරන පිටුවේ නම් publish කරනවා.

ඔය නිකන් ඉන්න වෙලාවට මේ තියෙන කොන්දේසි වලට අනුව ගැලපෙන වාක්‍යයක් හිතල බලල ඔය උඩින් කියල තියෙන ලින්ක් වලට ගිහින් පෝස්ට් කරන්න.

වැඩි විස්තර ඕනේ අයට ඔය ඉහත ලින්ක් වලින් ගිහින් දැන ගන්න පුළුවන් වෙයි. මම ඉතින් පොඩි දැනුවත් කිරීමක් උදෙසා මේක දාන්නේ. මිට වඩා දෙයක් මම දන්නෙත් නෑ.

හැබැයි ඉතින් ආතල් ජනක වැඩක් නේද තමන් හදපු  වැකියක් කාලයක් ගියාම  ඔය "The quick brown fox jumps over the lazy dog" වගේ සිංහල ෆොන්ට්ස් ඉන්ස්ටෝල් කරද්දී පේන්න තියෙන එක.

එහෙනම් සිංහල  බ්ලොග්කරුවන් වශයෙන් අපි සිංහල ෆොන්ට් ප්‍රදර්ශන වාක්‍යයක් හදමු ද?


Wednesday, May 20, 2015

කලින් සැමරූ ඇනිවසරිය

මේ අවුරුද්දේ ඇනිවසරි එකත් ඇවිල්ලා ගියා. අවුරුදුම 4ක්. ඇනිවසරිය ගෙවිලත් මාසයක් විතර වෙන්න ආවා. වැඩිය ඉතින් කියන්න දෙයක් නැති වුනාට අපි දෙන්නා බොහොම හොඳින් අතරමැද වලි, ලෙඩ, වැඩ පිස්සු, විකාර ආදී සියලු දේ සමග මේ අවුරුදු 4 ගෙවල දැම්ම. 

ඔය දෙන්නා 3න් දෙනා වෙන එක ගැන පස්සේ කොමෙන්ට් වලින් අහන්න ඉන්න වැඩිහිටියන්ට මේ මුලින් ම කියල ඉන්නේ අපි මේ යහපාලන ආණ්ඩුව යටතේ  ගෙදර ව්‍යවස්ථාවේ යම් යම් සංශෝධන සහිතව බොහොම දුර දර්ශිව හිතල බලල නියමිත විදියට ඒ පිළිබඳව කටයුතු කරනවා. මොකද මේ පහුගිය කාලේ සිද්ද වෙච්ච දේවල් ක්‍රමානුකුලව විශ්ලේෂණය කරලා ඒ පිළිබඳව ස්වාධින කොමිෂන් (ස්වාධින කිව්වට ඉතින්....)  අනුව තීන්දු තීරණ අරන් ඕනේ ඒවගේ දේවල් කරන්න. මම හිතන්නේ ඔය වැඩිහිටි අයට දැන් ඒවා පැහැදිලි ඇති. :)

මේ සැරේ ඇනිවසරි එකට අපි දෙන්න විතරයි. කොටින්ම කිව්වොත් එදා සුපුරුදු පරිදි ඔහේ ගෙවිලා ගියා. වැදගත්ම දේ කියන්නේ අපි දෙන්නට ඇර පවුල් දෙකේම වෙන කිසිම කෙනෙකුට යකඩෝ මුන් දෙන්න බැඳලා නේද කියලවත් හාන්කවිස්සියක්වත් මතක නැති වීම. කොටින්ම කිව්වොත්  අපි දෙන්නා ඇන්ටික් වීම නිල වශයෙන් මේ වසරේදී ආරම්භ වුණා කියන්න පුළුවන්. 

ඉතින් ඔය මෙලෝ රහක් නැතිව ගෙවිලා ගිය සෙනසුරාදාව රසවත් වෙන්න කියල හවස් වෙලා මම ගිහින් පොඩි කේක් ගෙඩියක් ගෙනාව. ඊට පස්සේ ඉතින් අපි දෙන්න බඩපුරා ඒක කෑවා. අල්ලපු ගෙදර චීනට කෑල්ලක් දෙන්න කියලද ඉතින්. (උදේට දැක්කත් බුම්මන් යන උන් දෙන්නට අපේ ඇනිවසරිය තියා අපි කවුද කියලවත්  කිසිම හැඟීමක්  නෑනේ ) සඳුදා වැඩට යනකොට ගෙනියන්න හිතුවත් ඉරිදා හවස් වෙද්දී ඉතින් 80% ක් විතර ඉවර වෙච්ච හින්ද ඉතිරි 20% ත් අපි දෙන්නම කාල දැම්ම. 

ඊට පස්සේ ඉතින් උයා ගත්ත දෙයක් කාලා ඔය සෙල්ෆි ෆොටෝ ටිකක් අල්ල ගත්තා මතක් වෙන්න කියල. ඕක තමයි ඉතින් කලේ. සිංදුවක් දාගෙන පොඩි නැටුමකුත් නැටුවා හෙහ් හෙහ් 

හැබැයි ඉතින් පුරුද්දක් වශයෙන් සෑම ඇනිවසරියකටම  කොහේ හරි යන පුරුද්ද අපි මේ සැරෙත් මග ඇරියේ නෑ. හැබැයි එකම වෙනස මේ සැරේ ඒ ගමන අපි දෙන්න ඇනිවසරි මාසේ මුලදීම ගිය එක. 

ඒකට හේතුව මේ රස්සාවට උදේ හවස යන එන එකයි, එකම සෙට් එකක් එක්ක එකම ප්‍රොජෙක්ට් එකක් කර කර එක කාමරයක් අස්සේ හිරවෙලා ඉන්න කොට සමහරවෙලාවට පට්ට විදියට එපා වෙනවා. ඉතින් ඔය එපා වීමේ උපරිමයක් ගිය මාසේ මුල හරියේ සෙට් වුණා. ඉතින් මේක හරියන මගුලක් නෙවෙයි අපි දෙන්න කොහේ හරි යමු කියල කාලයක් තිස්සේ පොඩ්ඩක් හොයල බලල මේ අවුරුද්දේ ඇනිවසරියට යන්න හිතාගෙන හිටපු ප්ලේස් එකට ගියා. 

වැඩි විස්තරයක් නෑ ෆොටෝ කෑලි ටිකක් දාන්නම්. 



මුහුදේ හදාපු හෝටලයක්. වෙනසක් තියෙන තැනක් හැබැයි මම හිතන්නේ මාලදිවයිනේ මිට වඩා ලස්සන මේ විදියේ තැන් තියෙනවා. මේකේ බීච් එක ලස්සන නෑ. ටිකක් මඩ වගේ

හැබැයි හෝටලේ තියෙන අනිත් පහසුකම් නම් වරදක් නෑ.

අපි බුක් කලේ ගහේ කඳ මුල හරියේ රූම් එකක්. ඒක අපේ බට්ටි නගාගෙ අති විශිෂ්ට අදහසක් මොකද කිව්වොත් ඔය අතු බෙදිලා තියෙන හරියෙන් රූම් එකක් ගත්තනම් අපිට මුහුදේ විව් එක කවර් වෙනවා.  අතු අග හරියේ තියෙන ඒවා ගණන් වැඩියි. ගොඩාක් ඒවා ෆැමිලි වලට ඉන්න හදපු ලොකු ගෙවල් වගේ. ඉතින් අපි දෙන්න ගත්ත තැනට කිසිම අවුලක් නැතුව හොඳ විව් එකක් ලැබුනා අඩු ගානට.

මේ තියෙන්නේ රූම් එකේ ඉඳන් බලනකොට තිබ්බ විව් එක. ඈතින් පෙන්නේ අර අතු වගේ තිබ්බ කාමර.

මේ තියෙන්නේ අනිත් පැත්තේ විව් එක
හවස් වරුවේ බීච් එකේදී ගත්ත පින්තුරයක් මේක. බීච් එක නම් චාටර්

ටිකක් රෑ වෙනකොට බීච් එකේ මේ වගේ ආතලුත් තියෙනවා
ඊට අනිත් පැත්තේ බීච් එකේ රෑ වෙනකොට මේ වගේ නැටුම් ගැයුම් එහෙමත් තියෙනවා

රූම් අතර එහෙ මෙහෙ යන්න නොමිලේ බයිසිකල් ලබා ගන්න පුළුවන්. ගහේ මුල ඉඳන් අගට යන්න සැහෙන්න දුරක් තියෙනවා. ඉතින් බයිසිකල් කියන්නේ හෙන සිරා වැඩක්

මේ තියෙන්නේ අපි දෙන්නගේ බයිසිකල් දෙක
මිට අමතරව ඉතින් ආබාධිත කෙනෙකුට, වයසක කෙනෙකුට නැත්නම් ඇවිදින්න , බයිසිකල් පදින්න කම්මැලි කෙනෙකුට එහෙ මෙහෙ යන්න මෙන්න මේ අපුරු වාහනේ නිතරම එහෙට මෙහෙට ගහ දිගේ යනවා. කැමති කෙනෙකුට එකේ නැගල යන්න පුළුවන්
උදේ කෑම අපිට කලින් බුක් කරලා ගන්න පුළුවන්, දවල් කෑම, රෑ කෑම කන්න විවිධ වර්ගයේ ආපනශාලා ගොඩක් ගහේ අතු ඔක්කොම එකට එකතු වෙන (පොල් ගෙඩි හැදෙන හරියේ) තියෙනවා.

තමන්ට කැමති දෙයක් කන්නයි තියෙන්නේ සල්ලි දීලා. ඒ රෙස්ටෝරන්ට් එහෙමත් කලින් බුක් කරලා යන්න පුළුවන්

මිට අමතරව ඔය සල්ලි දීලා එහෙ මෙහෙ යන පොඩි පොඩි ටුවර් පැකේජ් එහෙමත් තියෙනවා. අපි නම් ඒ මොකටවත් ගියේ නෑ.


හොඳට මේන්ටේන් කරන හොඳ සේවයක් තියෙන තැනක්. ගොඩක් යුරෝපිය සහ අනෙකුත් සංචාරකයෝ ඇවිල්ල හිටියා. මේ හොටෙල් එක තියෙන්නේ මැලේසියන් Grand Prix රේසින් තියෙන circuit එක කිට්ටුව. ඉතින් අපි ගිය දවසේ තමයි ඔය රේස් එකේ ෆයිනල් එක තිබුනේ. ඒ රේස් එකට ආපු අයත් කීප දෙනෙක් එදා නම් හිටියා. ලබන සැරේ ඔය රේස් එකත් බලන්න යන්න ඕනේ. 


ඕක තමයි ඉතින් විස්තරේ. කවුරු හරි කෙනෙක් හෝටලේට යනවනම් නොමිලේ යන්න ශටල් බස් සේවයක් තියෙනවා. වැඩේ කියන්නේ බට්ටි නගා යන්න කලින්ම කිව්වා ඔය ශටල් එක ගැන හොයන්න පොඩ්ඩක් කියල. මම ඉතින් බක පණ්ඩිතය වගේ අනේ ඕව කියට එයි ද දන්නේ නෑ.. තේරුමක් නෑ අපි ඔන්න ඔය ටැක්සියක් අරන් යමු වගේ හෙන ටෝක්ස් දීලා අන්තිමට රිංගිට් 125ක් රුපියල් 5000ක් විතර ටැක්සියට දීලා තමයි හෝටලේට ගියේ. එනකොට නිකමට වගේ විස්තරේ හොයල බැලුවම හැමදාම දවල් 2 ට හෝටලේ ඉඳන් ක්වාලා ලාම්පුර් නගරයට එන්න නොමිලේ බස් එකක් තියෙනවා.  ඒවගේම යන කෙනෙකුටත් ඔය Petronas  Twin Towers දෙක ළඟින් ඒ බස් එකට නගින්න පුළුවන් (මම හිතන්නේ හොටෙල් එකේ රිසවේෂන් එකක් තියෙන්න ඕනේ බස් එකට නගින්න නම්). 

අපි දෙන්න ඉතින් හවස ඒ බස් එකේ ඇවිල්ල එතනින්ම කෝච්චියට නැගල අන්තිමට ගෙදරට ආවා මුළු වියදම රිංගිට් 17ක් ද කොහෙද හෙහ් හෙහ් ඒ කියන්නේ රුපියල් 750-800ක් වගේ. ගෙදර උන්දෑ කියන දේ අහන්න පුරුදු වෙන්න ඕනේ කියල පුරාණ සෘෂි වරු කියල තියෙන්නේ කට කහනවට නෙවෙයි.

ඇනිවසරිය පහු වෙලා මාසයක් විතර ගිහිල්ලත්, ට්‍රිප් එක ගිහිල්ල මාස 2ක් විතර ගිහිල්ලත් මේ වගේ පොඩි සටහනක් ලියා ගන්න තිබ්බ කම්මැලි කම යාන්තම් හරි අඩු වුනේ මේ අද තමයි. (ඔෆිස් එකේ චීන අයියල ටික නැති වීමත් එක හේතුවක්)

ඉතින් මේ ගෙවිච්ච අවුරුදු 4 හරි ජොලියෙන් ගෙවිලා ගියේ. බට්ටි නගා ඉතින් අර ඔතාගෙන ආපු කෙනාම තමයි. එකේ ආයේ දෙකක් නෑ.

මා ළඟටම තව ලංවෙලා,
හිඳින්න නිහඬ නුවන් පියා,
මා සීතාවෝ සැතැපෙන නින්දේ,
නූපුර හෝ ප්‍රියේ,
පාසුළැඟිල්ලේ අදනම් අවදිනොවේ,
කුසුම් කැකුළ නිදනා තුරා,


සඳගිරි පව්වේ පෙරදා සංසාරේ,
සැතැපුනු දා දුටු කින්නර පෙම් සිහිනේ,
මහලු වෙලා අද සඳ වාගේ,
යෞවන රෑ සඳු,
බලාන උන්නාවේ,


මා ළඟටම තව ලංවෙලා,
හිඳින්න නිහඬ නුවන් පියා,
මා සීතාවෝ සැතැපෙන නින්දේ,
නූපුර හෝ ප්‍රියේ,
පාසුළැඟිල්ලේ අදනම් අවදිනොවේ,
කුසුම් කැකුළ නිදනා තුරා,


කල්ප කාල යුග අප අතරින් ගෙවිලා,
අපි යමු මේ රෑ අනාගතය සොයලා,
නලමුදු සුවඳේ නිදන මලේ,
මට මල් රොනවුලු,
සුවඳ දැනේ ළඳුනේ,


මා ළඟටම තව ලංවෙලා,
හිඳින්න නිහඬ නුවන් පියා,
මා සීතාවෝ සැතැපෙන නින්දේ,
නූපුර හෝ ප්‍රියේ,
පාසුළැඟිල්ලේ අදනම් අවදිනොවේ,
කුසුම් කැකුළ නිදනා තුරා,

සිංදුව කොපි කලේ මේ අවුරුද්දේ 20 වෙනි ඇනිවසරිය සමරපු රවී අයියාගේ මේ සටහනෙන්

මේ සිංදුව ටිකක් විතර වයසට ගිය (රවී අයියල වගේ :D) අයට වඩා ගැලපුනාට වයසට යෑම ආරම්භ කරපු අපි දෙන්නටත් 100%ක්ම ගැලපෙනවා

Monday, May 18, 2015

දෙකක් නැත.

ඔවුන් විරයෝය.
එහි දෙකක් නැත.
නමුත්
පරාජිතයෝද මනුෂ්‍යයෝය.
එහිද දෙකක් නැත.

සිංහල දුක
දමිල දුක
කියා ද
දෙකක් නැත



සිංහල දුක තුනී වන්නේ යම් සේද
දමිල දුක තුනී වන්නේ ද එසේමය
එහිද දෙකක් නැත.

Monday, April 20, 2015

දවල් හීන

නිකන් ඉන්න වෙලාවක බලාගෙන කුරුටු ගාපු චිත්‍රයක් 


වෙලාව යනවා දැනෙන්නේ නෑ ..
ඉන්නේ කොහෙද කියල මතක නෑ ..
කෑවද බිව්වද කියල ගානක් නෑ ..
 වටේ පිටේ ඉන්න මිනිස්සු ගැන නිනව්වක් නෑ ..
පටන් ගන්න තැනක් නෑ 
ඉවර වෙන තැනක් නෑ ..

මුළු සක්වලේම ඇවිදින්නත්  පුළුවන් 
නැත්නම් 
අල්ලපු ගෙදර කෙල්ල ගැන හිතන්නත් පුළුවන් 
එත් නැත්නම් 
රට හදන්න පුළුවන් 
හොරු අල්ලන්න පුළුවන් 
රට දියුණු කරන්න පුළුවන් 

ඒවා කම්මැලි නම් 
සුපර් හීරෝ කෙනෙක් 
ඔය ඉන්න හැම එකාටම තියෙන පවර් ඔක්කොම තියෙන තව එකෙක් 
මොනවගේ ඇඳුමක් හොඳයි ද ?
ඌ ට ඉන්න දුෂ්ටයෝ මොන වගේ ද ?
වාහනේට ලැම්බෝගිනියක් හොඳයි ද ?
නැත්නම් හෙලිකොප්ටරයක් !
බකින්හැම් අශ්වයෙක් !!!!

අල්ලපු ගෙදර කෙල්ල එච්චර සිරා නෑ ..
ඒ වගේ ද ඊට එහා ගෙදරට එහා ගෙදර ඉන්න නංගි ..
එයාගෙත් ඒ හැටි ගත යුත්තක් නෑ වගේ ..
ඔය ඔක්කොටම වඩා හොඳ හඳ වගේ ලස්සන 
හරීම අහිංසක 
අනේ හරි ෂෝයි 

එදා අරූ කරපු වැඩේ චාටර් 
ඌ ට එහෙම නොකර ඒක මෙහෙම කරන්න තිබුනනේ 
අනිත් එක අර මනුස්සය මොනවා හිතන්න ඇද්ද 
අනේ ඌ මොනවා හිතුවහම මට පාන් ද 
මොනවා උනත් අරූ කරපු වැඩේ වැරදි 

දැන් ඔය ඉන්දන ඉවර වුනාම 
මොනවා වෙයි ද දන්නේ නෑ 
ඉවර වෙන්න කලින් මොකක් හරි එකක් හොයා ගනියි 
මම නම් හිතන්නේ න්‍යෂ්ටික ශක්තියෙන් හරි හයිඩ්‍රජන් හරි එයි 
ඔය කිව්වට කරන්ට් එකෙන් දුවන්න කරන්ට් එක තියෙන්න එපැයි

 ආයේ අශ්ව කරත්ත ආවොත් මරු 
බ්‍රිස්කෝ කවුන්ට් ජුනියර් වගේ ඉන්න පුළුවන් 
මම හිතන්නේ 
කාර්මික යුගයේ ආරම්භය මිට වඩා රසවත් ව තියෙන්න ඇති
කව් බෝයිස් ල 
දුම් කෝච්චි 
කොහොමද බ්‍රිස්කෝ ගේ අස්වයා බයික් එකත් එක්ක දුවන රේස් එක 

සමාජවාදේ නම් අනේ මන්ද 
පශ්චාත් නුතනවාදී සන්ධර්භයක් ඇතුලේ 
ප්‍රජාතාන්ත්‍රිකව ඉන්න තියෙන එකම මදැයි 
මුන්ට ලුස් ද කොහෙද මොන මගුලක්වත් තේරෙන්නේ නෑ 

මොනවා උනත් සල්ලි තියෙන්න ඕනේ 
එක නැත්නම් ඔය මොකක් වත් වැඩක් නෑ 
ඒ වුණාට සල්ලි නෙවෙයි නේ ජිවිතේ 
අනේ බම්බුව 

නෑ ඒ වුනාට සල්ලි තියෙන්න ඕනේ නෑනේ ආතල් එකේ ඉන්න 
ආතල් ඔක්කොම තියෙන්නේ දැන් සල්ලි තිබිල ඔක්කොම කෙරෙන නිසා නේ 
ඒ වුනාට සරල ජිවිතේ සැපයි 
ඔව් ඉතින් සරල වෙන්න පුළුවන් නම් සැපයි 
බැරි වැඩ 

මේ ආගම් මහා බොරුවක් 
බොරුවක් නේන්නම් 
මිනිස්සුන්ගේ හිතේ තියෙන බය
බොරු බයක් ඇති කරලා එකට සැනසීම දෙනවා 

එහෙම ආගම් වලට බනින්න බෑ හැබැයි 
මොකද උපතින් ම දුෂ්ට ගති තියෙන මිනිස්සු ටිකක් හරි හොඳ වෙනවා 
ආගම් වෙනුවෙන් මරා ගන්න උන් ට නම් පිස්සු 
කවුද කියන්නේ මිනිස්සු උපතින්ම දුෂ්ටයි කියල 
දන්න බම්බුව 

හරි හරි උඹ තමයි ඔක්කොම දන්නේ උඹ පොර 

ඊයෙ රෑ කාපු කොත්තුව නම් පට්ට 
අදත් යන්න ඕනේ 
කෙහෙල් මල මේ බඩත් එක්ක බෑනේ 
බඩ නිකන් කලේ වගේ 

හැබැයි මේ යන විදියට ඉස්සරහට ඔය දියවැඩියාවට කොලෙස්ටරෝල් වලට 
ඔය තියෙන ඔක්කොම පොෂ් ලෙඩ වලට 
නිට්ටාවට හොඳ වෙන බෙහෙත් එයි 
දැන් ඔන්න ඔහේ කාල ඉන්නවා 

දැන් ඉස්සරට වඩා මිනිස්සුන් ගේ ආයු කාලෙත් වැඩි වෙලානේ 
ඉස්සරහට තව වැඩි වෙයි 
ඒ හැටි බය වෙන්න දෙයක් නෑ .

අපරාදේ තාත්ත හිටියනම් 
ඒ කාලේ ඔය ලෙඩ ගැන බෙහෙත් ගැන හරියට දන්නේ නෑනේ 
දැන් උනානම් පිටරටක හරි එක්කන් ගිහින් බේර ගන්න තිබුන.
මොනවා කරන්නද ඉතින් 
හොඳ තැනක ඇති 

ඇත්තටම ඉතින් මේ සංසාරෙ දුකයි තමයි 
ඉපදෙනවා මැරෙනවා 
දුක ම තමයි 
එහෙම කියල ඉතින් ඉන්න කාලේ මල පෙරේතයෝ වගේ ඉන්න බෑනේ 
සතුටින් ඉන්න ඕනේ .

ඔය පෙර ආත්ම වල තියෙන පුරුදු මේ ආත්මෙදිත් තියෙනවා කියන්නේ 
ඒ කියන්නේ මේ ජිවිතේ සතුටින් සැහැල්ලුවෙන් ඉන්න ඕනේ 
සසර කලකිරිලා වගේ ජිවත් වෙන්න පුරුදු වෙන්න හොඳ නෑ 
බැරි වෙලා හරි ආයේ ඉපදුනොත් 

මේකයි ඉතින් 
ඔය සංසාරෙ uncertain නේ 
ඔය uncertain දේ ගැන නෙගටිව් විදියට හිතන්නේ මොකෝ 
සුබවාදීව බලන්න පුළුවන් නේ 

රෙද්ද තමයි පොසිටිව් තින්කින් 
තනි බිස්නස් එකක් 

හැබැයි ඉතින් නන්නත්තාර වෙලා ඉන්න මිනිස්සුන්ට 
ගැම්මක් ගන්න උදව් වෙනවා 

ගැම්මක් කිව්වට ඇඟට කිසි ෆිට් එකක් නෑ 
ජිම් එකටවත් යන්න ඕනේ 
ජිම් ගියා කියල ඉතින් තෙල බහින්නේ නෑ 
අඩේ ඔය ෆැට් බර්නින් වලටත් පෙත්තක් හොයා ගනියි ද දන්නේ නෑ 
සිරා නේ 

දැන් ඒ කාලේ මිනිස්සු මහන්සි වෙලා වැඩ කලාට 
අපි මොනවට මහන්සි වෙන්නද 
මේ හැමදේම කරන්නේ මහන්සි නොවී නිකන් ඉන්න නේ 
දැන් මහන්සි වෙනවා පස්සේ නිකන් ඉන්න 
පිස්සු ද මන්ද අපිට 
දැනුත් නිකන් ඉන්න පුළුවන් නේ 

අර කොමට් එකට බැහැපු යානෙට මොකක් වුනාද දන්නේ නෑ 
නසා එකේ උන් මොකක් හරි කරන්න ඇති 
මට මොකෝ 
නාසා නෙවෙයි ඊසා නේද 

හැම එකාම නිකන් හිටියනම් 
කොහොමට තියෙයි ද මේ ලෝකේ 
හෙහ් හෙහ් 

අම්මට හුඩු හෙට වැඩ !!!!!

Tuesday, March 24, 2015

Toastmasters ලාගේ පබ්ලික් ස්පිකින්

     වේදිකාවක් උඩ නැගල කතාවක් කරන්න කොච්චර පුරුෂ මෙව්වා එකක් (ගෑනු අයට නම් මොනවා තියෙන්න ඕනේ ද කියල මම දන්නේ නෑ) ඕනේ ද කියල ඔය බැරි වෙලා හරි එහෙම කතා කරපු අය දන්නවා ඇති.

       ඔන්න කතාවක් කරන්න ඕනේ කියල සෙට් වෙද්දී මුලින් ම හිතෙනවා ආ ඕක මොකක් ද ... ඔය දන්න ටික කියල දාන එක නේ කියල පොර වගේ ලැස්ති වෙලා, විස්තර හොයාගෙන ඇට්ටි හැලෙන්න දෙන්නම් කියල ඉන්නවා. සුපුරුදු පරිදි ඉතින් ඕනෙම දෙක අන්තිම මොහොත එනකම් ආතල් එකේ ඉඳල ඔන්න ටිකෙන් ටික උඩට නගින්න වෙලාව එනකොට හාට් එකේ ලබ් ඩබ් සද්දේ එළියටත් ඇහෙන්න පටන් අරන් හීනියට දාඩිය දාගෙන එනවා. මේ අපුරුවට තිබ්බ කකුල් දෙක හීනියට මෙව්වා වෙන්න පටන් ගන්නවා. තව ටිකක් වෙලා යනකොට කලිසමත් හෙල්ලෙනවද කියල ෂුවර් නැති තරමට අර කකුල් දෙකේ මෙව්වා එක වැඩි වෙන්න ගන්නවා. හදිස්සියට කෙල පොඩ්ඩක් හොයා ගන්න බැරි තරමට උගුර කට වේලෙන්න පටන් ගන්නවා. "මොන මගුලකට මේක බාර ගත්තද, යකෝ අපුරුවට අර පුටුවක වාඩි වෙලා කියන දෙයක් අහගෙන ඉන්න තිබුනනේ, අනිත් එක මේවා මේ එහෙම කියන්න පුළුවන් දේවල් නෙවෙයි, හරියට ලැස්ති වෙන්නත් බැරි වුනා, මේකද යකෝ යහපාලනේ කියල හිතෙන්න පටන් ගන්නවා ."



       තව ටිකක් ලං වෙනකොට වටේ පිටේ වෙන්නේ මොකද කියලවත් සිහියක් නැති තරමට අර හීනියට වගේ පටන් ගත්ත මෙව්වා ඔක්කොම ටික උපරිමේටම ආපු ගමන් අපිට ස්ටේජ් එකට නගින්න වෙනවා.... අඩුම තරමේ ඉඳන් ඉන්න පුටුවෙන් නැගිටලා ඉස්සරහට යන්න වෙනවා ... 

      ඔය ස්ටේජ් එකට නැගල මයික් එක ගාවට යන ටික හරි පුටුවෙන් නැගිටලා ඉස්සරහට යන ටික හරි 90% ක් විතර වෙලාවට සිද්ද වෙන්නේ ෆුල් ඔටෝමැටික්. ඒ කියන්නේ නින්දෙන් ඇවිදිනවා වගේ තමයි. එකපාරටම ඉස්සරහ වාඩි වෙලා ඉන්න උන් ටික දැක්ක ගමන් තමයි අම්මට හුඩු කියල සිහිය එන්නේ ... 

     කොහොමින් හරි අටවාගෙන අවසර ගත්ත කියමුකෝ. ප්ලෑන් කරපු වචන ටික දාල වාක්‍යක් දෙකක් කියාගන්නත් පුළුවන්. ඊට පස්සේ ටික ටික එකින් එක මඤ්ඤං වෙන්න පටන් ගන්නවා. අන්තිමට කියන්න හිටපුව මුලින් කියවෙනවා. හුටා දැන් කමක් නෑ කියල කියාගෙන යද්දී කියන්න හිතපුවත් නැති කෑලි අතර මැද්දෙන් කියවෙනවා. එතකොට තමයි ආතල් මොකද කතාව ට්‍රැක් පැනගෙන යනවා නේද කියල හීනියට දැනෙන්න පටන් ගන්නවා. ආයෙත් ට්‍රැක් එකට අරගෙන මාතෘකාවට අදාළව කතා කරන්න කියල මොනවා හරි කියන්න ගියාම මුලින් කිව්වේ මොකක් ද කියල මතක නෑ. ටිකෙන් ටික ආ...ආ ... ම්ම්ම් .. හ්ම් ..වගේ සද්ද , පොඩි පොඩි කැස්ස.. ආදිය එන්න පටන් ගන්නවා ... 

      වාඩි වෙලා ඉන්න උන් එකා දෙන්න මුනට මුණ බලාගෙන හීනියට හිනා වෙද්දී වැඩේ ජෝන් බාස් ට ගිහින් කියල ප්‍රත්‍යක්ෂ වෙන්න පටන් ගන්නවා. අර පුරුෂ මෙව්වා එකේ ඉතිරි වෙලා තියෙන ප්‍රමානේ හැටියට ඔය අවස්ථාව වෙද්දී ඉරණම තීරණය වෙනවා. පුරුෂ මෙව්වා රින මට්ටමට ඉවර වෙච්ච උන් කෙලින් ම ගිහින් ඉඳ ගන්නවා. (සභාවේ සිනා  සැපයි කියල හිතාගෙන ). බින්දුව මට්ටමට වගේ තියෙන උන් බොහොම ස්තුතියි වගේ එකක් කියල හිනාවක් දාල යනවා ... මුලින් අනාගෙන පස්සේ හතර වටේ ගාගෙන යන්නේ කොහෙද මල්ලේ පොල් වගේ වගේ හරි කතාව කරලා පිළිවෙලකට ගැලපෙන්න අවසානයක් දාල එන්න තරමින් පුරුෂ මෙව්වා ඉතිරි වුනා කියන්නේ ඉතින් ඌ සිරා පොරක් තමයි .. ඔය අතින් ගත්තම ඔය දේශපාලකයෝ කියන්නෙත් සිරාම පොරවල් ... මොකද ඉතින් වගේ වගක් නැතුව ගල් බොරු කියල ජාතික වීරයෝ වගේ අපුරුවට බැහැල යනවනේ. 

       මම කිව්වේ මේ අපි වගේ හුදී ජනයට ඔය හිටපු ගමන් කට්ටියක් ඉස්සරහ කතා කරන්න සිද්ද වුනොත් මුණ දෙන්න වෙන සන්තැසිය ගැන .. හැබැයි උපතින් ම ඔය හැකියාවල් තියෙන අය ඉන්නවා. එයාලට ඕව සිම්පල් වැඩ ..

      මට ඔය පබ්ලික් ස්පිකින් කියන එක ටිකක් පුළුවන් .. මම හිතන්නේ අපේ තාත්තාගෙන් ආපු හැකියාවක්. හැබැයි ඔය මම කියපු ලක්ෂණ ඔක්කොම පහලවෙනවා කතාව කරන්න කලින්. යන්නේ කොහෙද මල්ලේ පොල් සින් එහෙමත් වෙලා තියෙනවා. හැබැයි පිළිවෙලකට අවසානයක් කරලා ඇවිල්ල ජාමේ බේරගන්න පුළුවන්. (කතාවේ හරය / ගත යුතු දේවල් වගේ ඒවා ගැන මට අදාළ නෑ. කියන්නා කෙසේ කිව්වත් අසන්නා සිහිබුද්ධියෙන් ඇසිය යුතුයි කියන්නේ ඒකනේ ..හෙහ් හෙහ් ) 

      මම මුලින් ම කතාවක් කලේ දහම් පාසලේ. මම හිතන්නේ ඔය උදේ රැස්වීමේ ද කොහෙද ඒ ගැන නම් ඒ හැටි මතකයක් නෑ. ඉස්කෝලේ කාලේදී ඒ හැටි ඕවට උනන්දු වුනේ නෑ. ඒත් ඔය කථික තරඟ වලට ද කොහෙද හිටිය.මට හැබැයි එච්චර අල්ලලා ගියේ නෑ ඔය කථික තරඟ වල දෙන හෙන පොර ටෝක් සහ අතපය විසි කරන විදිය මට එච්චර දිරවන්නේ නෑ. 

     ඉතින් පිරිසක් ඉදිරියේ ටිකක් වැදගත් විදියේ කතාවක් ස්ටේජ් එකක් උඩ නැගල මුලින් ම කලේ ඔය මගේ අර පොත එලි දක්වපු දවසේ ස්කොලේ මේන් හෝල් එකේ. එකත් ඉතින් සැහෙන්න නා ගත්තා . ගෙදරින් හොඳට පුරුදු වෙලා මෙහෙමයි අවසර ගන්නේ , මේ ටික තමයි කියන්නේ , මේ විදියට ඉවර කරන්නේ ආදී වශයෙන් ඔය මහතා ,මහත්මිය , මැතිතුමා යන වචන එහෙම හරියට කියල ඇවිල්ල ඉන්න අයට උදව් කරපු අයට ස්තුති කරන්න ඕනේ ආදී දේවල් ගැන හෙන අවවාද රැසක් එහෙම හම්බවුණා උත්සවේ දවසේ සහ ඊට කලින් ඉඳන් ම. 

     හැබැයි ඉතින් සිද්ද වුනේ මෙහෙමයි. මම අර පෝඩියම් එක ගාවට ගියා පිළිවෙලකට අවසර නම් ගත්තා. ලෑස්ති වෙච්ච කතාවකියන්න පටන් ගත්තට ප්ලෑන් කරපු පිළිවෙලට හරියට මතක් වෙන්නේ නෑ .. හැබැයි ඉතින් කොහොම කිව්වත් කියන්න ඕනේ මේවනෙ කියල ඔලුවේ තිබ්බ නිසා මම මට පුළුවන් විදියට කතාව කළා .ටික වෙලාවක් යද්දී මෙන්න හෝ ගාල ඇඩෙනවා .. ඒ ඉතින් ඔය අම්ම, තාත්තා උදව් කරපු පවුලේ අය ගැන කියද්දී .. කොහොම හරි ටික වෙලාවකින් හෝල් එකේ හිටපු සැහෙන කට්ටියක් ඇඬුව. හෙහ් හෙහ් .. ඊට පස්සේ ඉතින් මහතා මැතිතුමා කෑලි නෑ. අවසානය නම් කොහොම වුනාද කියලත් මතක නෑ දැන්. හැබැයි ඒ හැටිම චාටර් නම් වුණේ නැද්ද කොහෙද . කට්ටියම අනුකම්පා කරලා සද්ද නැතුව ඉන්න ඇති .. :)

      හරි ඊළඟට කරපු කතාව නම් ඉතින් ඔන්න පබ්ලික් කියන්න පුළුවන්. එකත් ඔය පොතේ සින් එකක් ම තමයි . ඔය පොතේ සින් එක කලේ මම උසස් පෙළ කරන කාලේ නේ. උසස් පෙළ කරන කාලේ වැඩිපුරම කරන්නේ රටේ ඉන්න ටියුෂන් මාස්ටර් ල ගාවට දුවන එකනේ . අපිත් ඉතින් ගම්පහ ටවුමේ තියෙන හැම පන්තියක් ම වගේ ඒ දවස් වල වන්දනා කළා . ඉතින් ඔය ගිය ප්‍රසිද්ධ පන්ති වල අවසන් දවසේ තියෙනවනේ පොඩි පාටි සීන් එකක් . මම ගිය එක ෆිසික්ස් පන්තියකත් දැන් ඔන්න ඔහොම පොඩි පහේ පාටි සීන් එකක් තිබුන . සර් ළමයින්ට දෙන්න ඕනේ අවසන් උපදෙස් දීල සුභ පතල අනම් මනම් කරලා එහෙම ඔය ඉතින් කට්ටිය ස්ටේජ් එකට් නැගල ඔය සින්දු කියල ආතල් ගන්න අවස්තාව ආව. 

     දැන් ඉතින් වැඩේ නැගලම යනවා අපිත් ඉතින් ඔහේ සිංදු අහගෙන ආතල් එකේ ඉන්නවා . දැන් ඔය කට්ටිය එක එක්කෙනාව ස්ටේජ් එකට නග්ගන්නේ සර් ට තුන්ඩු කෑලි යවලනේ . 

      සරුත් ඉතින් ඕව කියවල "ආ මෙන්න මෙයාට සින්දු කියන්න පුළුවන් ලු .. ආ කෝ එයා එන්න බලන්න" කියල කතා කරනවා . 

     කොල්ලො කෙල්ලෝ ඉතින් ආතල් එකටත් එක්ක නවා. හැබැයි ඉතින් ලස්සනට සිංදු කියන්න පුළුවන් ළමයි ගොඩක් ඔය පන්තිවල ඉන්නවා . වැඩේ ඔහොම නැගල යන අතරෙදි අපිත් ඉතින් දන්න දන්න උන්ගේ නම් ලියල සර්ට යවනවා . 

     ටික වෙලාවක් යනකොට මෙන්න සර් කාරය මගේ නම කියල කතා කරනව .. .කවුරු හරි එකෙක් හරි එකියක් හරි මගේ නමත් ලියල සර්ට යවල මට සිංදු කියන්න පුළුවන් කියල . අම්ම ගහයි බැට් එකෙන් කිව්වලු . මේ මොන මගුලක් ද කියල මම උඩ බිම බලනවා .. මට එහා පැත්තේ හිටපු එකා .. බක බක ගගා හිනා වේවි මාව තල්ලු කරනවා පලයන් පලයන් කියල .. හෙහ් හෙහ් .. 

      මම ඉතින් ඔන්න ඔහේ ඕනේ එකක් වෙන්න කියල නැගිටලා දැන් පිටිපස්සේ ඉඳන් ඉස්සරහට යනවා . ඔය පොතේ සීන් එක ගැන මම සර් ට කලින් දවසක කියල තිබ්බ නිසා සර්ට මාව මතකයි . මම පස්සේ ඉඳන් ඉස්සරහට යන ටිකට දැන් සර් ඔය පොතේ සීන් එක ගැන එහෙමත් කියල "අහ් මම දැනගෙන හිටියේ නෑනේ ඔයාට සිංදු කියන්නත් පුළුවන් කියල " වගේ පොඩි පොඩි චාටර් ටෝක් දෙනවා .. 

     ඔය විදියට ක්ලාස් එකේ බංකු මැද්දෙන් යනකොට දැන් අර උඩ හරියේ කියපු විදියට කකුල් මෙව්වා වෙන එක , හාට් බීට් වැඩි වෙන එක , තොල කට වේලෙන එක ආදී දේවල් සියල්ල එකවිට වෙනවා .. මොකද මම ඔය නානකොට බාත්රුම් එකේදී සිංදු කැල්ලක් කිව්වට මලාට සිංදු නම් කියන්න පුළුවන් එකෙක් නෙවෙයි නේ .. මම හිතන්නේ ජීවිතේටම සිංදුවක් මුල ඉඳන් අගට කියල නැතිව ඇති .. ඉතින් මොකේදැයි දන් වළඳන්නේ වගේ ෆුල් කොර වෙලා ඉතින් ඔටෝමැටික් වගේ යැවෙනවා. 

    ඕනේ එකක් කියල ස්ටේජ් එකට නැග්ගා ... බොක්ක කූල් වේලා ගියා හෝල් එක දිහා බැලුවහම ඔය ටියුෂන් ක්ලාස් එකක අඩුම තරමේ 500ක් වත් ඉන්නවනේ .. අන්තිම දවස නිසා හවුස් ෆුල් .. සර් ඉතින් පිටට තට්ටුවකුත් දාල මයික් එක අතට දුන්න .. ඔය වගේ ඒවායේ ඉතින් ඔය අවසර ගැනිලි , ෆෝමල් කතන්දර නෑනේ .. කොල්ලෝ ඉතින් මයික් එක ගත්ත සිංදු කිව්වානේ  . 

    මම ඉතින් හොඳට හුස්මක් එහෙම අරන් "අනේ මට සිංදු නම් කියන්න බෑ. මම මේ සර් දැන් කියපු , මම ලියපු පොතේ තියෙන කතාවක් කියන්නම් කියල අර පොතේ තිබ්බ පලවෙනි කතාව කියාගෙන කියාගෙන ගියා .. මොකද ඒ දවස් වල මගේ ඔලුවේ තිබුනේ ඕක නේ .. ඉතින් අමුතුවෙන් හිතන්න දෙයක් තිබුනේ නෑ .. කතන්දරේ කිව්වා .. හීනියට හූ පාරවල් එහෙමත් ඇහුනද මන්ද .. දැන් නම් මතකත් නෑ .. කොහොම හරි ඉතින් විනාඩි 10ක් විතර ඕක කිව්වා ... ටික වෙලාවක් යද්දී ඉතින් අර කකුල් මෙව්වා වෙන එක එහෙම හරි ගියාට කොච්චර වුනත් ෂුවර් එකක් තිබුනේ නෑ කලින් නිකං එන්ජිම ස්ටාර්ට් කළා වගේ හෙල්ලිච්ච හැටි ඔය ඉස්සරහ පේලි වල හිටපු ගෑනු ළමයි එහෙම දැක්ක ද කියල .. හෙහ් හෙහ් 

    ඊට පස්සේ ඉතින් කතාවේ අවසානයට අවට පස්සේ එහෙනම් ඉතින් "ඔන්න ඕකයි කතාව .. මෙච්චර වෙලා අහගෙන හිටියට බොහොම ස්තුතියි" කියල ස්ටේජ් එකෙන් බැහැල රොබෝ වගේ හිටපු බංකුවට ගිහින් වාඩි වුණා .

  හැබැයි ඉතින් ක්ලාස් එක ඉවර වෙලා ගම්පහ ටවුන් එකේ ඔය ස්ටේෂන් එක පැත්තෙන්  යනකොට හොරෙන් හොරෙන් බලන ගෑනු ළමයි කීප දෙනෙක් ම දැක්ක .. හෙහ් හෙහ් මල් මල් ආතල් ඉතින් ..

   කොහොම හරි ඉස්කෝලෙන් පස්සේ විභාග ඉවර වෙලා රස්සාවලට ආවට පස්සේ ඔය පබ්ලික් ස්පිකින් තියා ගෙදර මිනිස්සු එක්කවත් හරියට කතා කරන්නේ නැති තරමට මේ කොම්පියුටරේට ඇබ්බැහි වුණා .

එතනින් මගේ පබ්ලික් කතා සමය ඉවර වුණා ...ඒ කාලේදී මට තිබ්බ තව බොහෝ හැකියාවල් සිරාවටම මේ කොම්පියුටර් රස්සාව නිසා මොට්ට වෙලා ගියා කියන්න පුළුවන් කනගාටුවෙන් වුනත් 

   හරි දැන් ඉතින් ආගිය කතා පොර ටෝක් ඇති නේ. කවුද මේ Toastmasters කියන්නේ කියල බලමු . මම හිතන්නේ ගොඩක් පුද්ගලික ආයතන වල වැඩ කරන අය මේ Toastmasters clubs ගැන දන්නවා ඇති . මොකද මේ සංගම් පෞද්ගලික අංශයේ රැකියා කරන අය අතර ප්‍රසිද්ධයි . මේ Toastmasters clubs වල ඉතිහාසය ගැන නම් ඒ හැටි විස්තරක් මම දන්නේ නෑ . මෙන්න මේකෙ තියෙන දෙයක් තමයි . කෙටියෙන් කිව්වොත් ඇමරිකාවේ  තමයි මේකේ උපත සිද්ද වෙලා තියෙන්නේ  මේ වෙනකොට ලෝකේ රටවල් සිය  ගානක මේක ව්‍යාප්ත වෙලා තියෙනවා .



   දැන් ඔය මම කියපු පබ්ලික් ස්පිකින් කියන සිද්දි ඔක්කොම කලේ සිංහලෙන් නේ . ඔය වගේ එකක් මේ යන්තම් ගැට ගගහ කතා කරන ඉංගිරිසියෙන් කියන්න වුනොත් කොහොමද ..? 

   මේ Toastmasters club කියන්නේ මේ විදියට ඉංගිරිසියෙන් පිරිසක් ඉදිරියේ කතා බහ කිරීම හුරු කරන්න . අර කකුල් මෙව්වා වෙන එක , හාට් එක බල්ටි ගහන එක , තොල කට වේලෙන එක ආදී දේවල් නැතුව ඉදිරිපත් වෙලා ටිකක් පිළිවෙලකට කතාවක් කරන හැටි තමයි මේ සංගම් වලදී ප්‍රැක්ටිස් කරන්නේ .



   මම ඔය දෙවෙනියට වැඩට ගිය ටෙලිෆෝන් කොම්පැනි එකේදී මේ වගේ සංගමෙකට සම්බන්ද වෙන්න මට පුළුවන් වුණා .  මම එකට සම්බන්ද වෙන්න ප්‍රධාන හේතුව තමයි මේ ඉංග්‍රීසි කතා බහ කරනකොට අපිට තියෙන ලජ්ජා බය ටිකක් නැති කරගන්න එක .

ඔය සංගමේ ගැන පොඩ්ඩක් විස්තර කලොත් මෙහෙමයි සිද්දිය වෙන්නේ 

අනිත් ඕනෙම සංගමයක් වගේ මේකෙත් ඉන්නවා සභාපති කෙනෙක් , ලේඛම් කෙනෙක්  භාණ්ඩාගාරික කෙනෙක් ආදී වශයෙන් තනතුරු . තව එක එක ඒවා තියෙනව. මේ තියෙන්නේ ඉන්න ඔක්කොම නිලධාරි මණ්ඩලය 

President 
Vice President Education
Vice President Membership 
Vice President Public Relations 
Secretary Treasurer 
Sergeant at Arms 

Ah-Counter 
The purpose of the Ah-Counter is to note any overused words or filler sounds. 

Grammarian 
The Grammarian helps club members improve their grammar and vocabulary. 

Timer 
A Timer is responsible for monitoring the time of meeting segments and speakers. 

Toastmaster 
The Toastmaster is a meeting's director and host. 

Topics master 
The Topics master delivers the Table Topics portion of the meeting. 

Meeting Speaker 
Every speaker is a role model and club members learn from one another's speeches. 

Table Topics Speaker 
Table Topics helps members develop their impromptu speaking skills. 

Evaluator 
Evaluators provide verbal and written feedback to meeting speakers. 

General Evaluator 
The General Evaluator evaluates everything that takes place during the club meeting.

            ඔය ආයතනයේ තිබ්බ අපේ සංගමේදී මම දැරුවෙ Sergeant at Arms කියන තනතුර . ඒ කියන්නේ මේ වගේ සංගමයක් පවත්වන තැන පොඩි පොඩි සංවිධාන කටයුතු කරන එක තමයි රාජකාරිය වෙන්නේ .  ඔය කට්ටිය හමු වුනේ  අපේ ඔෆිස් එකේ උඩම තට්ටුවේ තිබ්බ roof top එකේදී.  ඉතින් ආයතනයේ  විවිධ අංශ වලින් සමහරවිට දුර ඉඳල එහෙම එන අය ඉන්න නිසා මේ හමුවීම පවත්වන තැන ඉන්න කෙනෙක් තමයි ඔය තනතුරට පත් වෙන්නේ වැඩේ කරන්න ලේසි නිසා .

අනිත් තනතුරු ඔක්කොම නිල වශයෙන් තියෙනවා . ඒ නිලධාරින් ම තමයි ඉතින් ගොඩක් වෙලාවට සමාජිකයින් විදියට ඉන්නෙත් . මොකද සාමන්යෙන් ඔය ආයතනයක තියෙන සංගමෙකට 10-20 ක් අතර ප්‍රමාණයක් තමයි සහභාගී වෙන්නේ ..

 මේ Toastmasters club වලදී කෙරෙන්නේ සහභාගී වෙලා ඉන්න අයට පිරිසක් ඉදිරියේ ඉංග්‍රීසියෙන් විනාඩියක් දෙකක් මොකක් හරි මාතෘකාවක් ගැන කතා කරන්න අවස්තාව ලබා දෙන එක . නමුත් මේක සිද්ද වෙන්නේ සම්මත විදියට පිළිගත්ත ක්‍රමයකට . නියම විදියට පවත්වන Toastmasters club එකක් හරියට පවත්වන විදිය ගැන ලියවෙච්ච උපදෙස් ලියවෙච්ච පොත පත මේ සංගම් ලියාපදිංචි කරනකොට ලබා ගන්න පුළුවන් . ඒ විස්තර මේ අඩවියෙන් බලා ගන්න පුළුවන් .

සාමාන්යෙන් රැස්වීම සති දෙකකට සැරයක් වගේ පැවැත්වෙනවා . රැස් වෙන හැමෝටම වගේ තත්පර 30 ක් විතර කතා කරන්න සිද්ධ වෙන රවුන්ඩ් රොබින් වටයේදී සිද්ද වෙන්නේ ටොපික් මාස්ටර් විසින් නියම කරන මොකක් හරි දෙයක් ගැන එක් කෙනෙක් තත්පර 30 ක් කතා කරනවා . කාලය අවසානයේදී Timer බෙල් එකක් ගහල කලින් පුද්ගලයා අවසන් කල වචනය අරගෙන ඊලඟට ඉන්න කෙනා තව තත්පර 30 ක් කතා කරනවා . මේක ගොඩක් විනෝද ජනක වැඩක් . කවුරුත් කාවවත් විහිළුවට ගන්නේ නෑ .. අඩු පාඩු හෙවිල්ලක් නෑ .. හැමෝම තමන්ට පුළුවන් විදියට තත්පර 30 ක් කතා කරනවා . හිර වුණා  කියල ගානක් නෑ .. මොනවා හරි ටිකක් කියන එක තමයි වැදගත් . පොඩි වෝම් අප් සෙෂන් එකක් .  මේක ඉතින් හැමදාම මෙහෙම නැතිව වෙනත් වෙනත් මාතෘකා ගැන ටිකක් විනෝද ජනක විදියට කරනවා

 ඊට පස්සේ සංගමයේ ඉන්න අයට තම තමන් සුදානම් වෙච්ච මාතෘකා ගැන විනාඩි 5-7ක් වගේ කාලයක් කතා කරන්න පුළුවන් . මේවා ගොඩක් වෙලාවට Competent Communication Manual කියලා නිත්‍ය සමාජිකත්වය ගන්න අයට  Toastmasters International එකෙන් ලබා දෙන පොතට අනුකුලව එක් එක් සාමාජිකයා විසින් කරන කතා . සාමාන්යෙන් නම් පිළිවෙලට පොත් සඳහන් විදියට අදාලව කතා පවත්වනවා තමන් කැමති මාතෘකාවක් යටතේ . ඒ කියන්නේ උදාහරණයක් විදියට ආධුනිකයෙක් මුලින් ම කරන්න ඕනේ ice break කියන කතාව . මේක ටිකක් පුරුදු වෙලා පිළිවෙලකට කරන්න ඕනේ . මේ කතා වලදී අපේ තියෙන අඩුපාඩු ගැන අපට උපදෙස් ලැබෙනවා . ඒ වගේම නිත්‍ය සාමාජිකයින් ගේ පොතේ තමන් කරපු කතාව සහතික කරලා තමන්ගේ සංගමයේ Toastmaster ගෙන් අපිට අත්සනක් ලබා ගන්න ඕනේ . මේ විදියට පොතේ තියෙන හැම කොටසකටම අදාලව කතාවක් පැවැත්වීම තමයි කරන්න ඕනේ . මේ තියෙන්නේ පොතේ තියෙන ටොපික්ස් ගැන පොඩි සටහනක් http://www.1stlondontoastmasters.com/CC_Manual.pdf

ඊට පස්සේ ටේබල් ටොපික් වටය එනවා . එතැනදී ටොපික් මාස්ටර් විසින් කලින් ලෑස්ති කරපු මාතෘකා ගැන කැමති කෙනෙකුට විනාඩි පහක් කතා කරන්න පුළුවන් . මෙහෙදී හැමෝම කරන එක අනිවාර්යයය නෑ .. ස්වේච්චාවෙන් කැමති අයට කරන්න පුළුවන් . හරියට හිටිවන කතා වගේ . ක්ෂණික කතා (impromptu speeches)මේ කතා වලදී ඒ ගැන පොඩි උපදෙස් දීමක් , අඩුපාඩු ගැන කියල දීමක් සිද්ද වෙනවා . ඒ සියල්ල බොහොම සුහදව සිද්ද වෙන දේවල්.

 සාමාන්යෙන් සෑම සමිති වාරයකදීම වෙනත් ක්ලබ් එකකින් හෝ එහෙම නැත්නම් වෙනත් ප්‍රවීන Toastmaster වරයෙකුගේ දේශනයක් සුදානම් කරනවා . බාහිරින් නැති නම් සංගමයේ ඉන්න ප්‍රවීන කෙනෙක් ගේ කතාවත් තියෙනවා . ඊට පස්සේ කෙරෙන ප්‍රධානම දෙයක් තමයි විවිධ සංගම් වල සමාජිකයින් සහභාගී වන තරඟ . මේවා ක්ලබ් මට්ටමින් දිස්ත්‍රික් මට්ටමින් රටවල් මට්ටමින් පැවැත්වෙනවා .

පසුගිය වසරේ WORLD CHAMPIONSHIP OF PUBLIC SPEAKING දිනුවේ ලංකාවේ කෙනෙක් මේ තියෙන්නේ ඔහු ගැන විස්තරේ . මේ ධනංජය මහතා වරක් අපේ ක්ලබ් එකට ආවා . එහිදීත් ඔහු අපුරු කතාවක් පැවැත්තුවා . මේ කතා ගොඩක් වෙලාවට හිතන්නට යමක් තියෙන කතා . කෙටියෙන් අවශ්‍ය දේ නිර්මාණාත්මක විදියට පැවසීම තමයි කෙරෙන්නේ . මේ ධනංජය හෙට්ටිආරච්චි මහතාගේ කතා ඒ අතින් අති විශ්ෂ්ටයි කියන්න පුළුවන් .

 මේ තියෙන්නේ ඔහුගේ ජයග්‍රාහි කතාව .

 එක හමුවක් සාමාන්යෙන් පැයක් පැය 2ක් අතර කාලයක් තියෙනවා . පටන් ගන්න කලින් පොඩි කෙටි කෑමක් කාලා පොඩ්ඩක් රිෆ්‍රෙශ් වෙලා තමයි වැඩේ පටන් ගන්නේ.

ඔය තියෙන්නේ Toastmasters club එකක් ගැන සරල විස්තරයක් .

 මම මාස 6-8ක් විතර මේ සංගමේ හිටිය . පස්සේ ඒ ආයතනයෙන් අයින් වුනාට පස්සේ ආයෙමත් වෙන ක්ලබ් එකකට සෙට් වෙන්න බැරි වුනා . ඔය හිටපු කාලේදී මම එක තරගෙකට සහභාගී වුණා . 3න් වෙනි තැනද කොහෙද හම්බ වෙලා තව තරගෙකට යන්න සුදුසුකම් ලැබුනත් මට යන්න උනේ නෑ .. ඔය ජොබ් මාරුව නිසා . ඒක එතනින් ම ඉවර වුණා . කොහොම වුනත් අපේ ක්ලබ් එකේ Charter Ceremony එකට සහභාගී වෙන්න මට අවස්තාව ලැබුණා . ඒ කියන්නේ නිලවශයෙන් Toastmasters International වල පිළිගත්ත ක්ලබ් එකක් බවට අපේ club එක පත්වෙන උත්සවය තමයි ඒක . ඒ දක්වා එන්න ක්ලබ් එකක් බොහෝ දේවල් කරන්න ඕනේ . කොහොම හරි අපි හිටපු කාලේ තුලදී ඒ තත්වයට ක්ලබ් එක පත් කරගන්න අපිට පුළුවන් වුණා . හිටපු නිත්‍ය සාමාජිකයෙක් වශයෙන් මටත් වරලත් සාමාජික (Charter Member) සහතිකයක් ලබා ගන්න පුළුවන් වුණා .

මේ Toastmasters club එකට සම්බන්ධ වීම නිසා අපිට ඔය පිරිසක් එක්ක සාමාන්‍ය ඉංගිරිසියෙන් කතා බහක් කරනකොට තියෙන කුලෑටි ගතිය , පොඩ්ඩක් ඉදිරියට එන්න තියෙන අකමැත්ත , ලැජ්ජාව වගේ දේවල් හදා ගන්න පුළුවන් . මොකද ගොඩක් වෙලාවට අපිට තියෙන අවුල දන්න චුට්ටවත් කියා ගන්න බැරි කමනේ .. ඒ වගේ දේවල් හරි යනවා ඉතින් මේ වගේ දේවල් වලට සහභාගී වුනාම .

මගේ නම් දැන් ලැජ්ජා බය සැහෙන දුරට නැති වෙලා .. අමු වැරදියට උනත් කමක් නෑ මට ඕනේ දේ කියල දාල කිසි ගානක් නැතුව ඉන්න පුළුවන් ... හෙහ් හෙහ් .. එංගලන්තේ මහ රැජින ගැන හිතල අපිට කතා කරන්න බෑනේ  නැද්ද .. :D